DILI, STLTIMORLESTE.com – IX Govenu Konstitusional ho planu atu harii laboratoriu saude integradu iha Timor Leste (TL), nunee bele fo tratamentu dignu ba saude publiku iha rai laran ho adekuadu.
“Ita presiza duni atu hadia setor saude iha Timor Leste, liu-liu kualifika kondisaun setor saude, hanesan harii laboratoriu saude integradu, adekuadu iha Timor Leste, hodi antisipa ba kondisaun moras neebe sai afetasaun ba saude publiku nian,” informasaun sira nee hatoo husi Visi Primeiru Ministru, Ministru Koordenador Asuntu Sosiais, Ministru Dezenvolvimentu Rural no Habitasaun Komunitaria (V-PM, MKAS, MDRHK), Mariano Assanami Sabino ba jornalista sira iha Ministeriu Finansas (FM), Dili, Segunda (20/01/2025).
Tuir nia, Timor Leste iha laboratoru, maibe Governu presiza hadia liu tan sentru nasional laboratoriu integradu atu bele asegura saude publiku, hanesan iha tinan kotuk moras fahi mate hotu, presiza duni atu harii laboratoriu, nunee bele antisipa kondisaun sira ho dignu.
Laboratoriu nee importante atu halo duni, liu-liu hadia fasilidade diak iha setor saude nian, tanba nee importante ba ema hotu nia vida, tanba virus oin-oin mak akontese iha Timor Leste, entaun antisipasaun estadu nian mak tenke hadia no dezenvolve diak setor saude, nunee fo seguransa ba ema hotu nia vida.
Entretantu Diretor Ezekutivu FONGTIL, Valentim da Costa Pinto “Koko” hatete, Governu liu husi dezenvolvimentu ba setor saude iha Timor Leste, presiza harii ona fasilidade saude neebe integradu iha territoriu Timor laran tomak, liu-liu melhora ekipamentu mediku sira no kapasitasaun profisional saude iha rai laran.
Iha nivel politika no enkuadramentu legal sira neebe Ministeriu Saude (MS) lansa ona politika integradu saude hamutuk ho Ministeriu Saude avaliasaun, liu-liu kona-ba jestaun formasaun ba saude ninian, instrumentu servisu sira nee hotu sei ajuda servisu haforsa sistema saude ida neebe rezilente no sustentavel.
(EST 1)
