DILI, STLTIMORLESTE.com – Jurista Timor oan konsidera katak, tempu ona atu harii Tribunal Judisial Primeira Instansia (TJPI) iha munisipiu hotu, hodi lori justisa hakbesik ba iha komunidade sira.
“Hau hanoin tempu to ona atu estabelese TJPI iha munisipiu hotu, atu lori justisa hakbesik ba iha komunidade sira,” dehan Jurista Jose Maria Guterres ba STL iha Kaikoli, Dili, Sesta (12/12/2025).
Tuir nia, estabelese TJPI iha munisipiu hotu iha nia pasu pozitivu, tanba lori justisa hakbesik ba iha komunidade sira, bele redus kazu pendente neebe oras nee dadaun numeru sei kontinua aas iha Tribunal.
Nia esplika, kazu pendente dala ruma mos kauza husi distansia neebe dook, komunidade balu labele lao too iha fatin neebe halao julgamentu ba, ikus mai prosesu balu kontinua adia numeru pendente kontinua aumenta.
Jurista nee sujere, planu hari Supremu Tribunal Justisa (STJ) bele mos iha planu atu estabelese Tribunal iha munisipiu hotu, atu inan aman sira neebe idade ona, sira neebe la iha kbiit hodi lao too mai iha kapital, sira bele sente katak justisa hakbesik ba iha sira.
Iha sorin seluk Akademiku UNTL, Sebastião Dos Santos dehan, Universidade sira kontinua produs finalista barak, tanba nee konsidera harii Tribunal iha Munisipiu hotu bele ona koloka finalista sira neebe liu husi Sentru Formasaun ba iha fatin sira nee.
“Ita nia Universidade kontinua produs finalista sira, tanba nee bele koloka sira kuandu estabelese ona Tribunal, maibe sira tenke tuir regra neebe iha liu husi Sentru Formasaun maka bele ba iha neeba,” dehan nia.
Afirma tan, Timor ukun aan kleur ona, presiza duni estabelese Tribunal iha Munisipiu sira, atu ema hotu bele sente justisa nia lalaok.
Antes nee, Prezidente Tribunal Rekursu (PTR) Afonso Carmona deklara ona katak, planu sei harii tan Tribunal iha munisipiu hotu, maibe prioridade ba iha Viqueque, Maliana, Ermera no sei hadia tan Tribunal Baucau. Depois sira nee remata ona, maka sei planu fali ba iha munisipiu seluk.
Jornalista: Terezinha de Deus | Editora: Domingas Gomes
