DILI, STLTIMORLESTE.com – Jurista Timor Oan husu Estadu liu husi Ministeriu Justisa, atu tau matan ba iha ofisial justisa sira.
Jurista Timor Oan, Sergio Dias Quintas dehan, Estadu tenke konsidera liu liu Ministeriu da Justisa, tau matan ba Ofisial Justisa Tribunal, Ministeriu Publiku, no Defensor Publiku, tanba sira faz parte elementu ida importante tebes, kontribui ba servisu Tribunal nian.
“Juiz labele halo servisu mesak konta hamutuk ho servisu ofisial justisa nian, no ohin loron ofisial justisa servisu makas tebes, dala ruma rekonesementu la iha. Tanba nee governu tenke konsidera sira,” dehan nia ba STL iha Kaikoli, Segunda (29/09/2025).
Nia sublina, iha tinan kotuk Prezidente da Republika fo posse ba iha Juiz no Prokurado,r nusa maka la fo kondekora ba ofisial Justisa, tanba ofisial justisa balu serbisu tinan naruk nia laran, tanba sa PR la kondekora ofisial da justisa.
Nia parte enkoraja ba iha hirarkia Tribunal, Ministeriu Publiku no Defensor Publiku, ema sira neebe servsiu tinan naruk ona iha Tribunal liu liu ofisial da justisa, atu tempu ruma iha kondekorasaun sira mos hamrik iha PR nia oin hodi simu kondekorasaun hanesan Juiz, Prokurador no Defensor.
Nia parte moe kuandu hamrik iha oin no ignora tiha ofisial da justisa sira, tanba ofisial da justisa hola parte mos iha serbisu Tribunal nian.
Iha fatin ketak Ministru Justisa Sergio da Costa Hornai hateten, relasiona ho preokupasaun ofisiais justisa sira nian, iha Munispiu sira liga ba sira nia transporte nee, dadauk Ministeriu Justisa halo proposta ba Orsamentu Jeral Estadu (OJE) ba transporte ofisial Justisa sira, maibe Governu sei halo analizasaun.
“Kona-ba preve orsamentu ba transporte ba Ofisial Justisa sira, ita halo maibe proposta sira tama ita boot sira hatene katak ita nia Sua Exelensia Primeiru Ministru ho Membru KRO Komite Revizaun Orsamentu halo hela analize ba iha proposta sira liu-liu iha kapital menor iha politika kada Ministeriu ida-idak serake bele hetan, asebilidade atu hetan aprovasaun bele halo akizasaun ba kareta sira iha tinan oin mai ou depende tanba sei iha proposta sei iha kompetensia Sua Exelensia Primeiru Ministru nian, “dehan nia.
Nia sublina, Ministeriu Justisa mos halo observasaun ba preokupasoens sira neebe Ofisial Justisa sira hasoru iha kada Munisipiu sira. Tanba nee Governu tetu Orsamentu Jeral Estadu, hamutuk dolar rihun 12 resin maibe sei haree ba orsamentu.
Jornalista: Terezinha De Deus
Editora: Domingas Gomes
