DILI, STLTIMORLESTE.com – Polisia Nasional Timor Leste (PNTL) asegura sidadaun estranjeiru husi nasaun Bangladesh hamutuk ema nain 17, tanba iha indisiu forte ilegalmente tama Australia. Hafoin halo identifikasaun, PNTL entrega sidadaun estranjeiru nee ba parte Servisu Migrasaun hodi aplika sansaun tuir lei migrasaun nian.
“Sidadaun estranjeiru sira nee uza Timor Leste hanesan pontu tranzitu hodi atravesa ba nasaun viziñu Australia ho ilegalmente hodi buka servisu iha neeba. Parte Servisu Migrasaun haruka fila fali sidadaun Bangladesh nee ba sira nia nasaun iha loron Sesta (24/10/2025),” tenik Porta Voz, Mouzinho Correia.
Portavoz Seguransa Interinu iha Ministeriu Interior, Superintendente-Assistente Polisia, Mouzinho T. Correia liuhosi konferensia imprensa iha Sala Multimedia Servisu Migrasaun, Ministeriu Interior, Kaikoli, Dili, Kinta (23/10/2025).
Iha konferensia imprensa nee, Porta Voz Mouzinho Correia neebe akompanha husi akompanha husi Asesor Seguransa Ministeriu Interior, Paulo Martins no Inspector Xefe Serbisu Migrasaun, Vicente Gusmao, informa katak iha loron Tersa (21/10/2025), PNTL ho ekipa konjunta operasaun sekreta sira halo apresaun ba sasan kontrabandu iha area Maubara.
Nia dehan, sasan hirak nee kompostu husi bebidas sira. Relasiona ho kazu nee, PNTL liu hosi Diresaun Seguransa Investigasaun Kriminal (DSIK) halo identifikasaun ba suspeitu nain rua (2) ho inisial AJS no ALXCDS, sidadaun Timor Leste.
Kazu seluk, katak Portva Vos Mouzinho Correia, iha loron Kuarta (22/10/2025), PNTL ho ekipa konjunta operasaun sekreta mos halo intervensaun ba kareta Kamioneta 5 hosi Atambua (Indonezia) neebe tula mina hatama mai Timor Leste ilegalmente ho modus subar iha kareta okos (ho jerigen subar iha kareta sasis nia laran).
“Kareta Kamioneta sira nee tama Timor Leste ho objetivu atu tula produtu lokal sira lori ba Indonezia,” katak Mouzinho.
Nia hatutan tan katak, alem de mina ekipa konjunta mos prende ba osan cash ho montante USD boot sein dokumentu hosi autoridade Indonezia no Timor Leste. Osan nain nee hela iha Dili.
Relasiona ho kazu nee, Polisia identifika sidadaun Indonezia nain 6 mak involve iha kazu nee ho inisial, OSH, YOL, MS, IF, PSDS no KIM.
Porta Voz nee haktuir katak durante semana ikus, PNTL, ALFAESA, no ekipa servisu sekreta realiza operasaun ba produtus ilegais sira no produtu balun neebe hatama ilegalmente hodi desvia taxa ba Estadu. Operasaun iha Kapital Dili, Maliana no Suai, konsege halo apreensaun ba produtu sira nee.
Porta Voz Mouzinho Correia mos informa katak iha loron 16 Outubru 2025, akontese kazu diskunfia tara aan iha PA Hatolia, Munisipiu Ermera. PNTL no DSIK hamutuk ho Eskuadra Hatolia rekolla informasaun no submete mate isin vitima Maria Cab ba autopsia.
Relasiona ho kazu sidadaun estranjeiru husi Bangladesh neebe tenta ilegalmente ba Australia, Ministru Interior, Francisco da Costa Guterres liu hosi Porta Voz Seguransa Ministeriu Interior nian, alerta ba maluk Timoroan hotu katak iha ema estranjeiru balun hahu tama mai Timor Leste ho objetivu hodi kontinua ba Australia liu hosi dalan ilegal sira, liu-liu aluga peskador sira nian ro hodi halo viajen ba Australia.
Tamba nee, Ministru Interior, Francisco da Costa Guterres, apela maluk sira hotu, liu-liu maluk sira neebe iha ro ka peskadore sira, karik iha sidadaun estranjeiru ruma mak atu aluga peskador sira nia ro hodi halo viajen ba Australia ilegalmente husu para informa ba autoridade sira atu halo prevensaun.
“Kuandu maluk sira fasilita sira maka ita boot sira no ema sira nee iha perigu nia laran, bele mout iha tasi laran ka autoridade sira bele kaer imi,” apela Ministru Interior.
Kona ba movimentu sidadaun estranjeiru tama no sai teritoriu nasional Timor Leste durante semana ida nia laran, Porta Voz Mouzinho haktuir katak dadus husi Diresaun Nasional Servisu Migrasaun neebe kontrola no rejista hatudu katak sidadaun estranjeiru neebe tama no sai teritoriu nasional Timor Leste hamutuk 16.877 kompostu husi feto 6.594 no mane 13.804.
Servisu Migrasaun no PNTL liu hosi Diresaun Tranzitu redaviarua hatama reseitas iha periodu refere hamutuk USD 35,890.00 + 12,942.00, total USD 48,832.00.
Jornalista: Mikael Mali Mau
Editor: Mikael Mali Mau
