BAUKAU, STLTIMORLESTE.com – Relasiona ema deskonhesidu neebe tenta naok labarik iha area Suku Triloka, Postu Administrativu Baukau Vila, Komando Polisia Munisipiu Baukau liu husi ekipa buka ona autor.
Tuir informasaun neebe iha, kazu ema deskonhesidu tenta naok labarik iha Suku Tirilolo, labarik nee mane idade 06 bainhira lao hela iha estrada publiku mak derepente motor la ho sapa matrikula husi kotuk, iha autor nain rua, ida konduz motorizada no ida tuur kotuk haksoit tun kous labarik hodi tula iha motor leten, maibe labarik konsege haksoit tun hodi halai ba fo familia.
Nunee Komandante Interinu Komando Polisia Munisipiu Baukau, Superintendente João Sancho Pires hateten, familia halo keixa ona iha Polisia Eskuadra Postu Baukau Vila no Komando Munisipiu simu ona informasaun, maibe ema neebe naok labarik utiliza motorizada la ho sapa matrikula, tanba nee Komando orienta aumenta volume pasa revista.
“Ita orienta ona eskuadra no intelijen sira no tranzitu halo chek point nafatin buka ema sira nee, tanba ema nee uza motor laiha matrikula, maibe ita tenta buka nafatin,” hateten João Sancho Pires ba jornalista sira iha Vila Nova, Baukau Kuarta (16/04/2025)
Komandante nee husu ajuda ba entidades hotu iha Munisipiu Baukau hodi relata informasaun ba Komando Polisia Baukau, bainhira hetan motorizada neebe halo sirkulasaun la ho sapa matrikula, nunee bele halo identifikasaun.
Maibe ba kazu nee, Komando Polisia Baukau sei esforsu masimu hodi kompleta evidensia forte liu tan liu husi faze investigasaun, tanba inposivel labarik idade kiik bele tebe ema neebe kous too monu hodi nia halai, maibe Komando nafatin esforsu hodi kompleta dadus.
“Tanba nee mak ita hakarak hateten, se ema hakarak atu naok nee la mosu hanesan nee, ida kotuk kous mak tebe aan monu mos ita haree didiak lai, maibe ita sei tenta,” João Sancho Pires fundamenta.
Nia akresenta, bainhira Komando esforsu liu husi investigasaun mak la hetan evidensia forte, sei bolu familia hodi responsabiliza ba aktus neebe polemika iha media sosia neebe halo publiku paniku.
Entretantu kazu iha loron 30 Marsu 2025, akontese hanesan iha area Laribere, Suku Defauasi, Postu Administrativu Baguia katak, ema deskonhesidu futu labarik feto minoridade ida tenta atu naok, liu husi faze investigasaun parte Komando Polisia Baukau detekta, iha problema privadu neebe tenta halo paniku publiku.
(tom)
