DILI, STLTIMORLESTE.com – Durante misa solenidade iha Tasi-Tolu ba falesimentu Papa Francisco, sarani sira kaer no taka metin retratu Papa Fransisco iha hirus matan nakonu matan-been.
Durante misa solenidade iha Tasi-Tolu ba falesimentu Papa Francisco, sarani Timoroan kontinua sunu lilin, halo orasaun no partisipa misa hodi fo omenajen ikus ba Pontifise Romanu.
Iha misa Solenidade nee Tereza Alves Pereira hatudu nia sentimentu liu husi nia entrevista hateten, sente todan no haree deit foto sente triste.
“Ami nia setimentu todan la halimar, maske nia lakon tiha ona maibe nia rai hela liafuan murak ba sarani sira iha Timor, hau sente triste laran dodok, maske nia laiha no ami haree deit nia foto nee hau sente triste para mate,” hateten Tereza Alves Pereira ba jornalista STL iha Tasi-Tolu, Dili, Sabadu (26/04/25).
Tereza hateten, sarani Timoroan sira hili Amu Papa foun mai mos tenke iha domin ho dame, tanba hanesan Amu Papa Frasiscos nia, maske laiha tiha ona maibe nia domin nafatin hamutuk ho ami.
Misa neebe prezide husi Bispu Dioseze Baukau, Dom Leandro Maria Alves nee hetan partisipasaun masimu husi sarani Timoroan sira iha kapital Dili no munisípiu balun.
Iha fatin hanesan, Paulo Tout hateten, sarani katolika haree tristeza boot ida, liu-liu iha Timor hotu hamonu mata ween no lakon aman diak ida neebe vizita ona rai Timor.
“Sarani tomak igreza katolika, haree tristeza boot ida liu-liu iha Timor hotu-hotu hamonu mata ween, triste no ita lakon ona ita nia aman diak ida neebe mai vizita ona rai Timor,” hateten Paulo Tout bainhira tuir misa Solene ba Falesimentu Papa Frasisco iha Tasi-Tolu.
Paulo hateten, haree deit imajen Amu Papa Fransisco nian no kompara ho iha loron 09 Setembru tinan kotuk sarani tomak haree direta ho kontente, maibe liu seidauk too tinan rona fali lia tatoli husi Vatikanu katak Papa Francisco iis laiha ona.
“Iha tinan kotuk iha fatin nee ita hotu kontente, maibe ohin ita hotu mai fali fatin nee mai ho triste, tanba ita lakon ona ita nia aman neebe mak diak ba igreja Katolika iha mundu,” dehan nia.
Enkuantu tuir Paulo, nia sei lembra nafatin Santidade Papa Fransisco nia liafuan sira dehan “Hau nia laran monu ba Timor, no kuidadu Lafaek sira atu lalika mai estraga imi nia fiar no kultura,” dehan Paulo.
(EST 3)
