DILI, STLTIMORLESTE.com – Portavoz eis profesores kontratu 2023, Agostinho Pinto sente triste ho teste espesial bolsa kandidatu profesores nee seidauk rezolve problema eis profesores kontratadu, tanba iha teste nee halo selesaun dokumentus no halakon tan eis profesores nain 38.
“Hau nia sentimentu triste tanba ami hanoin ho teste espesial nee bele rezolve ona problema profesores kontratu nian, maibe infelizmente iha teste nee sei halo mos selesaun dokumentus no halakon tan ami nia maluk hamutuk 38 pessoas ho diploma lisensiatura neebe tuir lo-loos la presiza ona halo selesaun documentus. Aleinde nee pontus ezame difísil los no halo profesores barak labele atinje valor diak, mezmu Ministériu Edukasaun atribui bonus 10 %. Manifestasaun sei kontinua lao too 31 Dezembru 2025, kuandu seidauk rezolve,” dehan Agostinho ba jornalista STL, Kinta nee (19/06/2025).
Agostinho dehan, sujere ba Ministeriu Edukasaun no Komisaun Funsaun Publika atu servisu hamutuk hodi rezolve problema profesores kontratadu nian. Basa liu husi teste ita sei la bele rezolve, tanba nafatin iha manan no lakon. Hau nia preokupasaun mak nee, solusaun ba sira neebe lakon nee saida? Serake ita husik deit ,tanba profesores sira nia statutu nuudar ajente administrasaun públika ka AAP nebe regula iha lei estatutu Funsaun Publika.
“Aleinde nee oinsa Ministériu Edukasaun atu rezolve sira neebe ho diploma bacharelatu no Ensinu Sekundariu,” katak nia.
(jac)
