BAUKAU, STLTIMORLESTE.com – Teknolojia ba Informasaun no Komunikasaun (TIC) Timor Institutu Publiku sensibeliza sistema Governu eletroniku ba entidades sira iha Munisipiu Baukau.
Informasaun nee hatoo husi Diretor Servisu Infraestrutura Rede TIC Timor I.P, Andre Felix Marques ba STL iha salaun apuramentu Baukau, Segunda (28/10/2024).
“Iha programa ida nee Ita fahe informasaun funsionariu publiku sira, tanba agora ita moris iha era teknolojia mundu dijitalizasaun, atu nunee bainhira ita implementa Governu eletroniku ita nia funsionariu sira bele iha ona konhesimentu kona-ba dijital nunee bele fasilita ita,” nia dehan.
Diretor nee sublina, sistema Governu eletroniku hanesan Government Cloud- https://www.cloud.gov.tl, Government e-Mail Service, OFICIO- Electronic Document & Record Management System inklui Human Resource Management System neebe dadaun implementa ona iha Nasional no Munisipiu balun.
Nia fundamenta, husi sistema Cloud espesiefiku ba servisu Governu nian inklui servisu e-Mail no seluk tan atu utiliza ba servisu koresponde kada Instituisaun hodi asegura dadus, tanba antes nee kada dirijente Instituisaun uza sistema pesoal neebe bainhira mandatu hotu, dadus sira iha sistema laran mos lakon.
Diretor nee rekonhese, mezmu Timor-Leste hahu hakat ona ba mundu dijitalizasaun, maibe redi telekomunikasaun atu fasilita sistema hirak nee atu halo servisu ho garante sei sai preokupasaun, tanba linha internet sei lentu.
Iha hanesan partisipante, Koordenador Pontu Fokal MJDAK Munisipiu Baukau, Elizio Plasido Ramos konsidera, sensibelizasaun refere importante tebes ba ajente estadu sira iha Munisipiu Baukau atu hatene, tanba bele hetan kapasitasaun husi parte TIC Timor I.P, hodi hatan ba sistema dijitalizasaun neebe mundu ohin loron infrenta, liu liu TL atu adere ba ASEAN.
“Ita atu adere ba ASEAN, pelu menus sistema nee ita komprende ona, tanba ASEAN nee lao tuir sistema avansadu,” nia tenik.
Tuir pontu fokal MJDAK nee katak, esforsu Governu nian liu husi parte oin oin atu kapasita ajente estadu sira iha nivel Munisipal hodi hatan ba nesesidade ASEAN nian nee diak, maibe durasaun tempu ba siensebelizasaun mak limitadu, tanba loron ida deit.
(EST 2)
