BALIBO, STLTIMORLESTE.com – Depois Parlamentu Nasional liu hosi Rezolusaun no.18/2022 de 1 Junhu, institui ona loron 16 Outubru nuudar Loron Nasional Liberdade Imprensa no tinan nee Timor Leste selebra Loron Nasional Liberdade Imprensa daruak, inklui selebra tinan 49 jornalista nain lima (5) neebe mate iha trajedia “Balibo Five”.
Jornalista nain lima (5) neebé mate iha trajédia “Balibo Five” nee mak hanesan Greg Shackleton (reportér) ho idade 29, Tony Stewart (gravadór lian) ho idade 21, Gary Cunningham (cameraman) hosi mídia HSV-7 (Seven Network) Melbourne ho idade 27, no Brian Peters (cameraman) ho idade 26 no Malcolm Rennie (reportér) hosi mídia TCN-9 (Nine Network) Sydney ho idade 29.
Konselhu Imprensa ho parseiru sira lansa ona Loron Nasional Imprensa nee iha Balibo, iha loron 16 Outubru 2022. Tinan nee, selebrasaun Loron Nasional Liberdade Imprensa ba daruak ho tema “Atmosfera Liberdade Imprensa iha Nasaun Demokratiku”.
Nunee, Konselhu Imprensa halao atividade sira hanesan feira produtu lokal, Forum Nasional Editorial.
Iha Tersa (15/10/2024) halao Forum Nasional Editorial koalia kona-ba Papel Media ba Asegura Demokrasia. Iha forum Nasional Editorial nee, orador nain rua mak koalia kona-ba tema ida nee mak hanesan, Akadémiku Institutu Superiór Filozofia no Teologia Dom Jaime Garcia Goulart (ISFIT), Armindo Moniz Amaral no Konselleiru husi Konselhu Imprensa, Benevides Correia Barros.
Iha Forum Nasional Editorial, iha sesaun tematika: Papél editór ba asegura independénsia editoriál, Akadémiku ISFIT, Armindo Moniz Amaral, hateten katak jornalista sira atu defende lia-loos no tenke iha kualidade morál.
Nia husu ba jornalista sira atu brani koalia lia-loos ba buat neebé loos no brani dehan sala ba buat neebé laloos liu husi jornalista sira-nia servisu. Nunee, jornalista sira tenke iha kapasidade intelektuál hodi haree faktus, elabora iha sira-nia serbisu liu-liu produtu jornalístiku sira no mós atu defende ida nee tenke iha kualidade morál.
“Jornalista sira tenke brani koalia lia-loos no barani dehan sala ba buat neebé laloos liu husi ita boot sira (jornalista) nia servisu. Kualidade moral nee naran katak ita barani. Dalan ida atu forma aten-barani mak fiel nafatin ba lia-loos, beibeik nunee kontinua,” dehan Armindo Moniz iha Forum Nasional Editorial neebe organiza husi Konsellu Imprensa iha Sidade Balibo, Munisipiu Bobonaro, Tersa (15/10/2024).
Iha oportunidade hanesan, Konselheiru Benevides Correia Barros dehan, perante profisionál komunikasaun sosiál sira inklui autoridade no komunidade Balibo katak, instrumentu atu garante no proteje Liberdade Espresaun, Liberdade imprensa liu-liu independénsia editoriál no sala redasaun nee iha instrumentu tolu.
“Ida mak lei, segundu mak profisaun no terseiru mak tenke iha morál, iha iha vontade, iha vokasaun, atu hateten katak lae ba lia neebé laloos,” dehan Benevides.
Nunee mos iha abertura Fórum Nasionál Editoriál, Prezidente Konselhu Imprensa, Otelio Ote hateten, intervensaun editoriál nee laós estatis, maibe haree mak oinsá nia frekuénsia, oinsá nia kualidade intervensaun, oinsá kapasidade atu prevene intervensaun ida nee no oinsá atu sai husi intervensaun ida nee.
“Meu komunikasaun sosiál laós deit iha Timor mak enfrenta problema ida nee, iha mundu, media barak mós enfrenta problema ida nee,” katak Otelio Ote.
Antigu jornalita nee mós argumenta katak, jornalista nia Liberdade laós absoluta, tanba iha regra neebé mak tenke kumpre no lao tuir.
“Ita kontinua selebra atividade sira hanesan nee, ita uza mós nuudar fatin para aumenta mós ita nia kapasidade téknika no intelektuál,” hatete Otelio Ote.
Partisipa iha Fórum Editoriál nee mak Autoridade Administrativu Postu Balibo Interinu, Mateus Maia no Komandante Polisia Nasional Timor Leste Eskuadra Balibo Interinu, Antonio dos Santos Maia, autoridade lokál no munisipál, autoridade seguransa no sívil, jornalista inklui komunidade sira no mós jornalista sira husi nasaun viziñu, Indonézia.
Tuir ajenda neebé iha, Serimónia selebrasaun loron nasionál Liberdade imprensa sei iha mós Misa, despozisaun ai-funan no sunu liu-liu inklui atribuisaun prémiu jornalizmu.
(mik)
