DILI, STLTIMORLESTE.com – Jerasaun Patriota, Jose Carvalho preokupa ho Timor oan sira, neebe durante nee kontinua nadodon ba buka servisu iha rai liur, tanba servisu iha rai laran laiha.
Kestaun Timor oan nadodon ba servisu iha rai liur no ema mai servisu iha Timor Leste tuir Jose katak, nee normal akontese iha mundu. Tanba mezmu Japaun riku liu, Xina mos bele riku liu, maibe sira nia ema mos ba servisu iha fatin seluk, no ida nee hanesan ema ida nia hakarak atu ba servisu iha fatin seluk neebe mak sira senti konfortavel ka diak liu. “Tanba nee mak ita nia joven sira nadodon sai ba rai liur, hodi buka servisu ba sustenta moris, tanba kampu servisu iha rai laran laiha,” dehan Jose ba STL, iha Perumnas, Dili, Kuarta (14/01/2026).
Laos deit kona-ba kampu servisu laiha, maibe sira mos observa durante nee problema boot ba Timor-Leste mak seidauk kria fabrika ruma, maski naton hahu tiha ona ho simente Baukau, mais too agora paradu hela. Asuntu ida nee no ida seluk mak dada kadoras ba Beasu, tanba ida nee mos bele kria kampu trabalhu boot ida ba Timor oan sira.
Preokupasaun hanesan hatoo mos husi Observador Politika, Martinho de Oliveira katak, too ona tempu atu buka tuir tanba saida mak joven sira sai hotu ba rai liur, tanba iha Timor- Leste (TL) laiha empregu, maibe ema husi estranjeiru tama mai Timor-leste laiha rohan, no Timor oan kontinua sai hela deit kada loron ba rai liur.
“Hau hanoin too ona tempu ita tenki iha peskiza ida, tanba haree ba komersiu iha TL kintu kantu, domina ho estranjeiru, ita nia ema sira nee duni sai hotu ba rai liur, nee laloos,” dehan Martinho.
(car)
