DILI, STLTIMORLESTE.com – Membru Parlamentu Nasional husu Timor oan hotu-hotu atu valoriza eroi sira nia luta liu husi kontribui ba dezenvolvimentu nasaun nian.
Deputada Cedelizia Farai dos Santos hatete, loron 31 dezembru loron eroi nasional no husu ba Timor oan tomak tenki haree ba eroi sira nia luta ba ukun aan ida nee, nunee Timor oan hotu-hotu bele goja, tan nee husu ba Timor oan hotu tenki valoriza eroi sira-nia luta.
“Valoriza ho ita nia hahalok sira, ita tenki hamutuk lori nasaun nee ba oin, ita la bele hanoin tanba diferensa politika, koor politika, arte marsiais, diferansa o husi munisipiu ida nee halo ita atu fahe malu, hau hanoin nee la bele, nee ita la valoriza ita nia eroi sira nia luta. Sira nia luta ne’e ida deit ba ukun aan, ba Timor hodi hamutuk lori nasaun nee ba oin,” hatete Deputada Cedeliza Faria dos Santos ba jornalista sira iha sala Bankada CNRT, Segunda (29/12/2025).
Deputada Cedeliza mos husu Timor oan hotu-hotu atu reza nafatin ba eroi sira neebe fila hikas ona ba Maromak nia kadunan santu no sira neebe sei moris atu hamutuk lori dezenvolvimentu ba nasaun nee.
“Hau parabens loron ida ohin ba eroi nasional sira fo mos orasaun sira neebe Maromak bolu ona no orasaun ba ita atu hamutuk nafatin hodi lori Timor ba oin,” dehan nia.
Jornalista: Alberto Menezes
Editor: Xisto Mendonça
