BAUKAU, STLTIMORLESTE.com – Dirijente Organizasaun Naun Governamental Asistensia Legal ba Feto no Labarik (ALFeLa) Baukau konsidera, Timoroan balu seidauk utiliza media sosial ho loos.
Diretora Ezekutiva ALFeLa, Marcelina Amaral hateten, kazu neebe iha tinan 2025 rejista iha ALFeLa hamutuk 78 kompostu husi kazu violensia domestika, violasaun seksual, abuzu seksual ba minor inklui kazu insestu. Hanesan kazu violensia domestika neebe akontese kauza husi sistema patriakal, no kazu sira seluk nia kauza husi autor sira mentalidade neebe seidauk forte atu hasoru ema seluk.
“Entaun ita dehan razaun tanba sa akontese? Nee mai husi ema pesoal nia hanoin neebe ita haree kazu sira neebe akontese iha Timor, ida mos impaktu mai husi ema utiliza media sosial la utiliza ho loos, tanba media sosia iha buat diak buat diak buat la diak iha neeba, ita utiliza ba buat neebe diak nee ita diak, maibe ema balu utiliza ida nee fo sai informasaun neebe la diak, nee mak ita dehan viola ema seluk nia direitu,” Marcelina Amaral hateten iha Vila Nova Baukau, Sabado (31/01/2026).
Nia sublina, media sosial hanesan Facebook, WhatsApp, YouTube no seluk tan nuudar meius ida atu fasilita sidadaun sira asesu sedu ba informasaun sira kona-ba akontesementu no seluk tan mak iha benefisiu atu aprende lisaun pozitivu sira, maibe iha Timor Leste sidadaun balu, seidauk hatene utiliza media sosial ho loos, tanba balu utiliza media sosial sira ba asaun seluk hodi hamosu kazu violensia iha sosiedade.
Nia konsidera, sidadaun neebe utiliza media sosial hanesan publika imagen no informasaun la diak sira kona-ba pesoal ida konsidera viola ema seluk nia direitu, tanba kazu sira neebe iha balu kauza husi media sosial.
“Tanba nee husi parte ami ALFeLa hakarak ajuda apoiu legal ba vitima feto sira atu bele hetan sira nia direitu asesu ba justisa neebe justu no laiha diskriminasaun iha nivel prosesu hotu, kazu 78 nee maioria iha Ministeriu Publiku nomos Tribunal,” Marcelina Amaral komenta.
Diretora Ezekutiva ALFeLa Baukau nee akresenta, husi kazu 78 neebe rejista, parte ALFeLa kuaze submete ona ba Ministeriu Publiku (MP) neebe daudaun kazu balu prosesa ona iha Tribunal.
(tom)
