DILI, STLTIMORLESTE.com – Povu no sarani Katolika Timor Leste sente triste tanba lakon Sua Santidade Papa Francisco neebe Nai bolu hikas ona iha Nain nia kadunan Santu, maske dook maibe orasaun sempre tatoli ba Santu Padre.
Tuir observasaun neebe STL hetan, bainhira Timoroan sira rona Sua Santidade Papa hakotu vida iha Loron Segunda (21/04/2025) sarani no povu Timor Leste hakbesik ba Tasi Tolu fatin neebe Sua Santidade Papa Francisco halo misa, no balu iha Monumentu Lesidere hodi halo orasaun hodi husu Jesus simu Santu Padre nia klamar bele hakmatek iha lalehan.
Sarani Rofina Soares hatete, nia sente triste tanba lakon bibi atan katolika diak ida Sua Santidade Papa Francisco neebe nai bolu ona, maske la asiste direita maibe nia ho familia nafatin presta omenajen ba sua Santidade Papa Francisco Iha Monumentu Lecidere.
“Hau tanis tanba hanoin tuir, maske Papa ho idade maibe tanba domin boot ba nia ema too sama ain iha Timor Leste, tinan kotuk ita haksolok tanba simu Sua Santidade, maibe tinan ida nee ita triste tanba Maromak bolu ona Aman Santu Padre Papa Francisco, maske ita la asiste tanba dook maibe nuudar sarani ita nia domin la hotu ba Santu Padre, Aman doben ami hadomi ita maibe dook ami povu rai ida nee nafatin tatoli orasaun ba ita bele hakmatek rohan laek,” dehan nia.
Nia husu sarani sira nafatin reza ba Sua santidade Papa Francisco nunee bele hakmatek iha kadunan Santu.
Nunee mos Xefe Kaza Sivil Interina, Henriqueta Maria da Silva bainhira remata presta omenajen ba Sua Santidade Papa Francisco iha Monumentu Lesidere hatete, Timoroan iha sentimentu ida amigavel, sentimentu ida klean tebes tanba tinan liu ba Sua Santidade Papa simu konvite husi Prezidente Republika nian hodi mai vizita rai doben Timor Leste nomos vizita espesialmente iha Prezidénsia Repiblika.
“Prezidente rasik mós iha amizade ida neebe klean ho Sua Santidade Papa, liu-liu ba inisiativa Fraternidade Umana. Maske Sua Eselensia Prezidente Republik no Xefe Kaza Sivil laiha maibe iha Prezidensia neebe bele reprezenta Prezidente ho estrutura tomak marka prezensa iha nee hodi fo omenajen ba Sua Santidade Papa hatudu ami nia sentidu lakon, sentidu domin ba Sua Santidade Papa,” katak Henriqueta.
Entretantu Asesór Polítiku Lere Anan Timur hatoo sentidu kondolensia profunda ba Sua Santidade nia mate.
Nia sublina, importansia atu hanoin hikas Amu Papa nia mensajen ba povu Timor Leste: “Que a Vossa Fé Seja a Vossa Cultura”.
Orasaun hamutuk nee destaka relasaun klean entre Papa Francisco no Timor Leste, neebe simu ho laran ksolok Sua Santidade durante nia vizita ofisial foin lalais nee neebe inklui resepsaun signifikativu iha Palasiu Prezidensial.
“Papa Francico nia mate afeta tebes Timor Leste neebe maioria populasaun katoliku no povu foin lalais nee hetan onra atu simu Amu Papa durante ninia vizita neebe ema hotu antes nee hein kleur ona iha Timor Leste,” katak Lere.
Iha momentu espesial ida nee halibur hamutuk autoridade governamental sira, lider relijiozu sira, sosiedade sivil sira no sarani Katolika sira hotu hodi hanoin hikas vizita istoriku Papa Francisco nian mai Timor Leste iha fulan hirak liu ba.
Aleinde nee Prezidente Republika dehan hafoin rona Falesimentu Papa Francisco nian, PR dehan Maktoban Santu Padre nuudar Lider Mundial neebe matenek no barani hodi defende ema kiik no kiak sira no mos nasaun kiik no kiak sira neebe hetan violasaun husi Poder mundial sira.
“Papa Francisco, papa ida ke iha impaktu boot liu iha mundu ho nia intelektual, nia korajen, nia barani, koalia makaas defende kiak no kiik sira, defende nasaun kiik no kiak sira, nasaun frajil sira, koalia kontra injustisa, nia koalia hasoru poder mundial sira neebe mak hanehan rai kiak sira,” katak PR, Horta.
(eme)
