DILI, STLTIMORLESTE.com – Timoroan balu hahu la respeita ona lider sira hanesan Primeiru Ministru (PM) Kay Rala Xanan Gusmão, Eis Prezidente Republika Francisco Guterres Lú Olo, Eis Primeiru Ministru (PM) Mari Alkatiri no seluk tan, tanba maluk Timoroan hirak nee gosta insulta sira iha media sosial hanesan Facebook.
Jerasaun Patriota, Daniel da Silva preokupa, Timor oan balu hahu la respeitu fali lideransa sira, koalia aat no tolok lider no veteranu sira, ida nee sira konsidera laos hanesan ema. Atitude hanesan nee laos ema neebe autor ba dezenvolvimentu, maibe autor ba krime tanba nee presiza haree.
“Hanesan Jerasaun Patriota hau husu governu bele foti kestaun nee, tanba Timor oan balu trata fali ita nia lideransa sira, hanesan maun Xanana, maun Mari, tolok veteranu sira neebe mak durante nee luta ba nasaun, ida nee laos ema neebe mak la edukativu”, dehan Daniel ba STL iha Akait, Dili, Kinta (22/01/2026).
Nia dehan, buat sira hanesan nee mak husik bei-beik, nee ladiak, maski sira diferensa ideias no politiku, maibe presiza respeitu nafatin sira. Joven sira neebe ba iha rai liur, iha media sosial nee haree ba tolok lideransa sira arbiru deit, ida nee presiza haree selae Timor-Leste (TL) nee sai oinsa.
Iha parte ketak, Observador Politika, Joao de Oliveira hatete, karik iha media sosial iha buat ruma laloos bele haree, maibe atu dehan katak, ida nee presiza lei sibernetika, atu nunee bele regula media sosial.
“Tanba ita haree iha media sosial, Timor oan balu liu husi media sosial hanesan Facebook, Youtube, hodi trata no koalia aat ba lider, aat liu edit lider sira nia vidio neebe ita haree la edukativu tebes,” dehan João.
(car)
