DILI,STLTIMORLESTE.com – Governu Japaun liu husi Emabiaxada Japaun iha Timor Leste despedida ho bolsa estudu Timoroan nain 10 hodi ba estudu iha nasaun Japaun.
Tuir embaixador Japaun iha Timor Leste, Tetsuya Kimura katak, durante nee estudante hamutuk 120 mak halao ona sira estudu iha universidade Japaun, neebe mak husi bolsa estudu husi Ministeriu Edukasaun nia no programa JDS inklui Jica.
“Hau ho laran ksolok informa ba imi hotu katak, too ohin loron estudante Timoroan nain 120 resin mak ba halao ona sira nia estudu iha universidade Japaun, inklui nain 33 neebe ba liu husi programa bolsa estudu Ministeriu Edukasaun, Siensia no Teknolojia Japaun, nain 17 liu husi Akademia Defeza Nasional Japaun, nain 34 liu husi programa treinamentu longu prazu JICA nian no nain 29 liu husi programa JDS,” hateten Tetsuya Kimura iha nia knaar fatin Farol, Kuarta (19/03/2025).
Embaixador nee hateten, numeru ida nee sae beibeik kada tinan no ami hein tebes estudante barak liu tan mak sei mai hamutuk tan iha grupu alumni Japaun iha nee, tanba iha tinan ida ne’e Japaun sei haruka estudante Timoroan nain 10 neebe mak sei komesa sira nia estudu iha universidade Japones sira.
Iha fatin hanesan, bolseiru Elvanio Antonio De Fatima da Cruz hatete, nia sente orgulhu tebes hodi reprezenta Timoroan ba estudu iha Japaun, sente kontente tebes ho kooperasaun entre nasaun Timor Leste ho Japaun.
“Hanesan Timoroan orgulhu no admira tebes-tebes bele reprezenta hau nia rai, hau liu hanesan selesinadu Defeza Akademia ba Militar nian, tanba nee hau sente kontente tebes ho kooperasaun Timor Leste ho Japaun neebe mak fo oportunidade diak tebes ba hau hodi bele kompete atu hasae hau nia konhesimentu liu tan iha mundu akademia Japaun,” hateten bolseiru Elvanio.
(EST 3)
