DILI, STLTIMORLESTE.com – Governu liu husi Sekretariu Estadu Formasaun Profisional no Empregu (SEFOPE) kontinu simu trabalhador Re-Entry nain 532, atu kontinua ba servisu iha Korea du Sul.
“Ita nia trabalhador Timoroan nain 52 neebe kategoriza nuudar trabalhador Re-Entry, signifika sira neebe ba servisu iha Korea du Sul kontratu hotu ona, sira mai Timor Leste, kompania iha Korea liu-liu area fabrika no peska bolu fila fali sira atu kontinua halao sira nia servisu fali iha Korea du Sul,” dehan Diretor Diresaun Nasional Empregu Estranjeiro (DNEE), João Correia Pereira liu husi nia diskursu iha Salaun Bekora, Dili, Tersa (17/12/2024).
Nia dehan, Trabalhador Re-Entry atu kontinua halao sira nia servisu iha Korea du Sul, signifika kompanhia iha konfiansa diak ba sira, katak durante trabalhador sira nee servisu iha Korea du Sul hatudu disiplina, respeita no kreatividade servisu iha kompanhia, nunee bolu fila-fali ba servisu, nee mak hanaran trabalhador re-entry.
Tanba nee joven Timoroan nain 52 neebe sai re-entry atu ba servisu fali iha Koreia du Sul atu kuidadu aan nafatin, tanba razaun ema barak mak hetan moras, bainhira atu aranka, tanba nee presiza prepara aan diak, antes ba servisu fali iha Korea du Sul.
Konfiansa neebe mak kompanhia fo ba trabalhador Timoroan nain 52 nee mai husi razaun ida katak, trabalhador neebe servisu diak, iha boa-vontade hodi servisu kontribui ba kompanhia no servisu kreatividade.
Tanba nee husu ba maluk trabalhador Timoroan hotu atu kontinua servisu ho disiplina, lao tuir regulamentu sira neebe iha, labele lao tuir saida mak kompanhia seidauk iha rekonhesimentu no halo buat neebe mak kompanhia nee haruka, nunee mai fali TL bele iha konfiansa nafatin ba kompanhia atu rekruta fali trabalhador sira ba servisu fali iha Korea du Sul, liu-liu iha area fabrika no peska nian.
Trabalhador Re-Entry, Donasio Magno Fernandes hatete, trabalhador hotu-hotu neebe servisu iha Korea du Sul, Australia, Inglatera no nasaun neebe deit presiza iha disiplna neebe diak iha servisu fatin ka iha fatin kompanhia sira, nunee kompanhia nain sira bele kontinua fo konfiansa ba trabalhador Timoroan sira hotu.
Kontratu mezmu hotu ona, maibe kompanhia sira bolu fila trabalhador ba kontinua halao servisu iha Australia, Korea du Sul, nee hatudu katak durante trabalhador Timoroan nee halo ser isu diak, iha krearividade disiplina ba servisu, nunee ohin kompanhia bolu nafatin ba servisu.
(EST 1)
