BAUKAU, STLTIMORLESTE.com – Tinan 20 resin ona natar sira iha Suku Uaigae, Postu Administrativu Vemasi, Munisipiu Baukau abandona, tanba irrigasaun aat.
Xefe Suku Uaigae, Gaudensio C. Soares argumenta, Suku Uaigae postensial ba produsaun hare no produtu lokal seluk tan, maibe irrigasaun difikulta komunidade agrikultores sira atu halo natar, tanba irrigasaun la favorese hodi fo asesu bee ba natar.
“Natar neeba asesu irrigasaun husi mota, komunidade sira koko tiha ona kee manual, maibe liu husi sira nia kbiit neebe iha bee labele tama ba natar laran, nunee iha neeba abandona liu ona tinan 20,” haktuir Gaudensio ba STL iha Vila Nova, Sesta (04/04/2025).
Nia sublina, durante tempu okupasaun Indonezia natar sira iha Suku Uaigae kuaze funsiona, tanba asesu bee husi mota, maibe hafoin ukun aan no iha tinan 2000 impaktu husi udan boot hodi rezulta kanu hasan neebe simu bee husi mota laran oferese ba natar sira estragus.
Nia argumenta, hafoin kanu hasan hetan sobu, komunidade sira konsege utiliza sistema manual hodi kee no taka hikas kanu hasan neebe hetan sobu, maibe la konsege rezolve, tanba mota sobu kanu hasan ho distansia naruk.
“Nee presiza material pezadu ruma para ajuda loke fali irrigasaun nunee bee tama ba natar, se uza deit forsa ke’e, bee labele sai,” Gaudensio fundamenta.
Nia informa, natar iha Suku Uaigae neebe abandona hamutuk hektares besik 100, nunee tinan 20 resin ona komunidade Uaigae ba halo natar iha Suku Vemasi Tasi hafoin sustenta nesesidade familia.
Nunee preokupasaun komunidade nian kona-ba irrigasaun, parte Suku hatoo ona pedidu ba parte relevante iha nivel munisipiu, maibe seidauk hetan resposta.
Liga asuntu nee STL tenta konfirma Diretor Servisu Agrikultura Munisipiu Baukau, maibe lakohi fo komentariu, tanba razaun okupadu servisu.
(tom)
