DILI, STLTIMORLESTE.com – Hahu tinan 2024 too tinan 2025 nee Ministériu Saude (MS) rejistu ema ho moras Human Immunodeficiency Virus (HIV) hamutuk 277.
“Hahu husi fulan Janeiru 2024 too Janeiru 2025 ita nia MS rekolha sira identifika tan ema ho moris ho virus HIV-SIDA hamutuk nain 277,” hatete Xefe Departamentu ba Programa Kontrola Moras Hadaet (DPKMH) iha MS, Ambrozio Soares Trindade ba STL iha MS Kaikoli, Dili, Segunda (24/03/2025).
Nia esplika, MS kontinua esforsu husi nasional too munisípiu no postu sira hotu, bainhira hetan moras sira hanesan tenke responde kedas atu nunee labele daet ba ema seluk.
“Ministeriu Saude kontaktu no esforsu nafatin husi nasional too munisípiu no postu sira hotu, atu nunee bainhira ita identifika ema sira moras hanesan nee ita halo komunikasaun diak ho sira atu sira labele dook husi tratamentu,” nia esplika.
Nia informa, tuir dadus neebe MS fo sai total atual hamutuk ema neebe moris ho HIV-SIDA iha Timor Leste hamutuk nain 2256.
Iha fatin hanesan, Prezidente Institutu Nasionál Combate HIV-SIDA (INCSIDA), Daniel Marcãl informa, INCSIDA nia parte mak halo sensibilizasaun atu hasae konhesimentu ema nian.
“Ministeriu Saude mak iha dadus kompletu, ami INCSIDA fo apoia deit hodi fo formasaun ba komunidade sira atu oinsa bele hadook aan husi moras HIV-SIDA, ” nia deklara.
Nia haktuir katak, nia fiar katak liu husi sensibilizasaun sira halao komunidade no estudante sira bele hamenus moras HIV-SIDA iha Timor Leste.
“Durante ami halo sensiblizasaun ba komunidade sira no estudante sira, Ministeriu Saude mos hola parte hotu iha neeba atu nunee bele halo teste ba partisipante sira,” nia koalia.
Nia afirma, INCSIDA servisu hamutuk ho MS identifika tan ema moras ho HIV-SIDA no sira sei enkoraja sira hodi halo nafatin tratamentu ba HIV.
(jen)
