DILI, STLTIMORLESTE.com – Polisia Nasionál Timor Leste (PNTL) liu husi Diresaun Investigasaun Kriminal (DIK) rejistu vitima Timoroan nain 68 ba krimi trafiku umanu.
“Iha tinan 2024 ita rejista iha 68 kazu vitima ba trafiku umanu nian, Diretor Diresaun Investigasaun Kriminal (DIK) Nasional, Superintendente Polisia, Joao Belo dos Reis ba jornalista sira iha Komando Jeral PNTL Dili, Kinta (22/05/2025).
Nia dehan, husi numeru 68 sira nee barak liu ba servisu iha Malazia, Kambodia ho Xina nomos Saude Arabia.
Nia esplika, Timoroan neebe sai vitima ba trafiku umanu nee, tanba molok nee monu ba avizu sira neebe iha rede sosial neebe dehan loke rekutamentu ba sidadaun sira neebe interse ba servisu iha Malazia no nasaun sira neebe sira fo sai iha media sosial.
Nia deklara, bainhira Timoroan nee aplika ba rekutamentu sira neebe halo iha media sosial nee, ikus mai sira liu duni no ema neebe rekruta sira nee balun nee iha Timor mak servisu hamutuk sidadaun Malazia halo atividade, bainhira Timoroan nee ba too fatin destinasaun sira la ba servisu tuir saida mak molok nee fo sai iha rekrutamentu, sira nee uza maluk Timoroan ba halo fali atividade seluk.
“Ita apela ba sidadaun hotu- hotu atu kuidadu molok atu sai ba buka servisu, tenke hatene didiak, no ita husu ba joven sira hotu, komunidade Timor laran tomak neebe mak atu buka servisu iha estranjeiru karik konsulta didiak ho familia ho autoridade ho mos parte Governu nian antes deside sai ba ema nia rain,” nia informa.
Nia hatutan, iha tinan hirak autoridade polisia TimornLeste liu husi servisu investigasaun kriminal servisu hamutuk ho Interpol lori fila Timoroan neebe sai vitima ba trafiku umanu.
“Ita nia vitima ba trafiku umanu barak liu tuir dadus neebe ami rejista tinan kotuk, ida nee Malazia mak barak liu ema rekruta sira ba halo fali atividade seluk la tuir vaga neebe sira aplika iha media sosial,” nia koalia.
Nia argumetu, foin daudaun nee Timoroan feto ida rekruta sidadaun nain 14 atu ba servisu iha Slovakia nia lori Timoroan liu husi fronteira Batugade ba liu Kupang depois Jakarta mak ba liu Slovakia. Maibe servisu intelejensia deteta nia inisiativa nee no trava nia atividade nee iha linha fronteira too lori fila vitima nain 24 mai fali Dili.
“Ita halo prosesu Timoroan oan feto neebe rekruta ita nian ema nee ba Ministeriu Publiku no Tribunal aplika ona Prizaun Preventiva ba nia,” katak nia.
Iha fatin ketak, Akademista UNTL, Adérito da Silva informa, Diresaun Investigasaun Kriminal (DIK) tenke servisu makaas hodi detekta Timoroan neebe sai beibeik vitima ba media sosial.
“Ita mos husu ba Timoroan hotu tenke kuidadu labele fiar ba informasaun falsu sira iha media sosial, se lae bele sai trafiku umanu,” nia afirma.
(jen)
