ATAURO, STLTIMORLESTE.com – Diretor Ezekutivu Fundu Espesial Dezenvolvimentu Atauro (FEDA), Hermes da Rosa Correia hatete, iha tinan 2024 FEDA implementa ona projetu haat (4) mak hanesan Balkaun Uniku, Eskola Sekundariu 99 Atauro no estrada rua.
“Iha tinan 2024 FEDA implementa projetu lubuk ida mak Balkaun Uniku neebe mak ohin inaugura, ida mak Eskola Sekundariu 99 Atauro no estrada neebe mak ami loke iha Makadadi husi Aldeia Viti ba Perauk , husi Suku Beloi iha aldeia ida naran Arlo ba Adara, husi Aldeia Atekru ba Maker,” dehan Ezekutivu FEDA ba jornalista sira iha Maumeta Atauro, Sesta (15/03/2025).
Nia haktuir katak, karik aprovadu, hakarak duni halo estrada trosu nasional nee husi Vila Maumeta ba haleu tiha ilha Atauro sai fali mai iha Vila Maumeta sorin tuir planu no dezenhu BoQ neebe mak ami trasa.
Iha fatin hanesan, Ministru Administrasaun ESTATAL (MAE), Tomas Cabral hateten, FEDA hanesan fundu espesial ida neebe mak apoiu administrasaun autoridade iha infraestrutura suku tomak.
“Hanesan ohin Primeiru Ministru dehan katak, presiza halo planu estratejia ka planu teritorial, entaun iha fatin ida nee mak hahu halo planeamentu atu konsulta ho komunidade tomak saida mak diak ita atu hahu halao iha Atauro, tanba infraestrutura foin lao diak liu halo planeamentu ida para idak-idak iha nia fatin,” katak nia.
Nia hatutan, FEDA diak liu iha Atauro duke FEDA iha Dili, levamtamemtu laiha edifisiu nee lao hotu ona, Diretor Adjuntu liu-liu ba tekniku nee muda mak iha Atauro para halo planeamemtu.
(EST 2)
