DILI, STLTIMORLESTE.com – Iha tinan 2025, Prezidensia Republika (PR) liu husi Sosiedade Sivil no Asuntu Sosial (SSAS) apoiu uma dignu 7 ba familia kbiit natoon, inklui fahe nesesidade baziku ba komunidade kbiit natoon hamutuk uma kain 1.414 no orfonatu 6.
Kestaun nee hatoo husi Koordenadora Servisu Sosiedade Sivil no Asuntu Sosial, Teresa dos Santos Ximenes ba jornalista STL iha palasiu Prezidensial, Nikolau Lobato, Bairo Pite, Dili, Sesta (02/05/2025).
Nia hatete, Prezidensia Republika liu husi SSAS hahu husi tinan 2025, hahu husi fulan janeiru too maiu entre uma dignu 7 familia kbiit naton, no entrega mos nesesidade baziku ba komunidade kbiit naton uma kain 1414, no orfonatu 6 iha Timor Leste.
Uma dignu no nesidade baziku balun entrega direita husi Prezidente Republika Jose Ramos Horta no no barak entrega husi SSAS husi Prezidensial republika nia.
“Iha 2025 Prezidensia Republika apoiu tan Uma ho Dignu hitu (7) ba familia ho kbiit natoon sira iha munisipiu mak hanesan Atauro, Lautem, Bobonaro rua, Manufahi, RAEOA no Ermera. apoiu Nessesidade bazika ba familia kbiit natoon ho nessesidade espesial sira iha tinan 2025 (Janeiro-Maiu) hamutuk 1.414, Orfonatos 6,” katak Koordenadora nee.
Koordenadora dehan, orfonatu neebe mak Prezidesia Republika fo apoiu mak hanesan Orfonato Irmas de Sao Paulo de Chartres (SPC) Manufahi, Centro das Criancas Maria Manleu Dil, Centro das Criancas Maria AIleu, Me. Ordem Carmelita Hera, Me. Superiora uma Mahon Salele, Comissão Caritativa Parokia São Jose AImutin Aimutin.
“Apoiu nesesidade bazika ba familia ho kbiit natoon no nesesidade espesial sira iha 13 munisipiu inklui RAEOA. Apoiu mos nesesidade bazika ba familia kbiit natoon neebe mai husu tulun iha Prezidensia Republika liu husi Diresaun Servisu SSAS,” katak nia.
Nia hatutan, durante Prezidente Republika Jose Ramos Horta asumi kargu nuudar Prezidente Republika apoiu ona uma dignu hamutuk 10 no 11 sei iha prosesu konstrusaun nia laran.
“Total apoiu uma Dignu husi Prezidensia Republika durante mandatu Prezidente Republika Jose Ramos Horta apoiu ba familia kbiit natoon sira entrega ona uma hamutuk uma 10, Uma Dignu 11 mak sei iha prosesu konstrusaun nia laran,” katak nia.
Nia hatutan, planu ba konstrui uma ba familia ho kbiit natoon sei kontinua too mandatu Prezidente Republika nian remata.
Prezidente Republika, Jose Ramos Horta liu husi Unidade Sosiedade Sivíl no Asuntu Sosial Prezidensia Republika neebe lidera husi Asesor Quintiliano Moniz, foin lalais nee fahe nesesidade baziku no material desportu nian ba rezidente vulneravel sira husi Aldeia Dotik iha Same, Munisípiu Manufahi.
Inisiativa nee inklui mos inaugurasaun ba uma foun ida ho kios neebe entegra ba família vulneravel ida, neebe dezena atu fornese oportunidade rendimentu sustentavel ba sira-nia futuru.
“Ami espera iha futuru bele tau matan nafatin ba ema vulneravel sira hanesan ami, espresa Adelino da Costa Amaral, Xefe Suku Dotik, neebe hatoo agradesimentu profundu ba Prezidente Ramos-Horta ba apoiu neebe koordena ho Autoridade Protesaun Sivíl no organizasaun partisipante sira seluk. Família benefisiariu mos fahe sira nia apresiasaun, hodi nota oinsa asistensia nee transforma ona signifikativamente kualidade moris benefisiariu sira nian.
Iha serimonia nee, Asesor Quintiliano Moniz sublina katak apoiu mai diretamente husi Prezidente Ramos Horta hodi lori esperansa ba membru komunidade sira neebe vulneravel liu neebe husu ona asistensia liu husi autoridade lokal sira. Inisiativa nee hetan apoiu parsial husi material sira husi Fundasaun Nippon, neebe deskreve hanesan “Prezidente nia belun sira”. Uma neebe konstrui ho maizumenus USD $13,000 husi orsamentu Prezidensia nian neebe orijinalmente ajenda atu entrega husi Prezidente Ramos Horta rasik, neebe labele marka prezensa tanba vizita ofisial sira neebe lao hela ba rai liur.
Asesor Quintiliano Moniz kompromete mos atu diskute ho Prezidente Ramos-Horta kona-ba garantia sira seluk ba edukasaun família benefisiaria nia oan sira, hodi hatudu kompromisu Kontínuu Prezidensia nian ba apoiu abranjente ba komunidade vulneravel sira iha Timor laran tomak.
Apoiu nesesidade bazika sei apoiu wainhira SSAS simu proposta husi autoriedade lokal sira eksepto nessesidade urjensia sira dezastre naturais, ahi han uma no seluk seluk tan liu husi media, ekipa SSAS tuun direta hodi ajuda.
(eme)
