DILI, STLTIMORLESTE.com – Governu liu husi Servisu Migrasaun iha tinan 2025 rekolha reseitas hamutuk US$2,480,820.00 ba kofre estadu.
“Reseita Estadu neebe Servisu Migrasaun koilheta hahú husi dia 1 Janeiru too 31 Dezembru 2025 liu husi emisaun vistu estensaun vistu no emisaun estensaun autorizasaun rezidénsia no aplikasaun koima hamutuk US$ 2,480,820.00,” hatete Diretora Jerál Servisu Migrasaun (SM), Inspetora Xefe Polísia Adelaide da Rosa ba jornalista sira iha nia knaar fatin Vila Verde, Kuarta (07/01/2026).
Nia dehan, Servisu Migrasaun 2025 konsege hasae reseita kompara ho 2024 neebe US$ 2,480,820.00.
Nia tenik, planu ba futuru primeiru melhora koneksaun entre sistema atendimentu no mos operasaun iha postu fronteira no kapasitasaun ba Servisu Migrasaun iha infrastrutura iha Postu Fronteira hodi hasae atendimentu públiku, hadia bein estar pesoal Servisu Migrasaun nian atu nunee motivu sira diak liu tan iha sira nia servisu.
Nia esplika, durante 2025 Servisu Migrasaun rejista movimentu ema tama no sai husi territóriu Timor Leste hamutuk ema rihun ualu ualu, atus haat, neen nulu resin tolu ho klasifiksaun ema tama ba teritoriu nasionál rihun atus tolu sia nulu resin neen, atus rua sia nulu. Inklui mós ema sai husi territóriu nasionál hamutuk rihun atus haat sanulu resin rua, atus ida hitu nulu tolu.
Nia informa mos katak, durante 2025 Servisu Migrasaun halo rekuza entrada estranjeiru sira ema atus ida rua nulu resin neen, tanba la prienxe rekezitus tama territóriu nasionál tuir lei migrasaun no azilio Timor Leste.
Nia deklara, Servisu Migrasaun iha 2025 fo mos apoiu repartriasaun ba sidaun estránjeiru hamutuk ema nain tolu nulu resin ualu, ba sira-nia nasaun orijen, maioria husi sidaun husi nasaun vizinu (Indonézia) neebe mak Servisu Migrsaun konsege repátria feto rua nulu resin neebe mak sira nia prosesu halao antes kona ba violasaun domestika ( kazu uma laran-nia) no depoizde prosesu sira husu fila fali ba sira-nia nasaun orijen.
Nia koalia, durante 2025 Servisu Migrasaun repátria mate isin nain sanulu resin rua ba sira nia nasaun orijen.
Diretora Servisu Migrasaun nee mos informa, durante 2025 Servisu Migrasaun rejista kazu violasaun ba lei migrasaun iha prosesu administrativu iha ema nain atus tolu sia nulu resin sia.
Nia dehan, durante 2025 SM mós esplusaun ema nain ida no prosesu krime ema nain tolu nulu resin lima no abandona voluntáriu totál ema ida sanulu resin neen.
“Totál kazu hotu-hotu hamutuk atus lima ualu nulu resin lima”, nia informa.
Nia dehan, Servisu Migrasaun konsege redús violasaun vistu ba sidadaun estranjeiru iha tinan nee nian kompara tinan 2024.
Nia hatutan, iha 2025 Servisu Migrasaun rejista fo emisaun vistu ema rihun sanulu resin ida, atus hitu sia nulu resin hitu mak hetan emisaun vistu foun. No mos servisu Migrasaun halo estensaun ba vistu ba ema rihun sia, atus tolu lima nulu resin lima.
Adelaide informa katak, iha 2025 Servisu Migrasaun halo emisaun autorizasaun vistu neebe halo husi Adidu Migrasaun sira iha rai liur hamutuk ema rihun ida atus lima ualu nulu resin tolu.
“Ho nunee durante 2025 Adidu Servisu Migrasaun konsege kontribui reseita ba kofre Estadu hamutuk dólar rihun atus ida liu”,nia subliña.
Nia dehan, servisu sira neebe Adidu Migrasaun halo iha rai liur nee mak halo emisaun viza garanted ba sidadaun estrájeiru sira.
“Bainhira sira too mai iha ita nia postu fronteira sira halo pagamentu uluk ba viza mak ita halo emisaun vistu ba sira,” nia afirma.
Jornalista: Jeniche da Costa
