DILI, STLTIMORLESTE.com – Durante tinan 4 nia laran Ekipa Jestor Programa (EJP) husi Ensinu Baziku Filial (EBF) Aituri Laran uza deit ai sunu, hodi tein merenda eskolar ba estudante sira hodi han.
“Kuaze tinan 3 ou 4 nunee ona mak ami uza ai sunu hodi tein merenda eskolar ba ita nian estudante sira, kleur ona mak husi ME la haruka gas mai iha eskola, maibe ita uza ai sunu nee halo ahi suar tama too sala de aula no suar iha areador eskola nian, tanba dapur neebe mak ami tein merenda eskolar nee besik los sala de aula, nee ahi suar difikulta tebes ita nian estudantes no profesor sira neebe mak iha sala de aula, maibe ida nee mak realidade iha terenu,” dehan Xefe EJP husi EBF Aituri Laran, Jacinta da Conceição ba STL iha nia knaar fatin, Kuarta nee (13/11/2024).
Xefe EJP nee akresenta, ai sunu nee maran hela, maibe ahi mak suar deit, dader tuku 6:00 sira too ona iha eskola, tanba loron ida sira tein dala 3, dader, meudia no tein ba estudante loraik ninia, menu ba merenda eskolar nee mak loron Segunda bifi, Tersa kalderada, Kuarta manu tolun, Kinta koto no Sesta fore mungu.
“Semana ida ita nian estudante sira han aifuan dala rua, nee mak han hudi, masan, maibe ita nian estudante sira han iha loron Segunda ho Tersa deit, ami la kaer osan, maibe kompanhia mak kaer osan, ami mai tein deit, ami nain 4 mak tein ba ita nian estudante sira, ami seidauk hetan formasaun, maibe enkontru ruma nee ami sempre ba tuir iha sentru,” hatete Jacinta.
(jac)
