DILI, STLTIMORLESTE.com – Komunidade neebe hela iha Zulo Knua, Suku Zulo, Postu administrativu Zumalai, Munisipiu Kovalima, tinan barak nia laran konsumu deit bee posu.
Marito Barros nuudar komunidade Suku Zulo, Aldeia Lale, hanesan mos lia nain dehan, asuntu ida nee sempre koalia beibeik ona liu husi media, maibe too ohin loron komunidade aldeia haat neebe mak hela iha nee maioria konsumu deit bee posu, tanba uluk sira asesu bee torneira, maibe bee refere la sai dezde iha fulan Junhu 2023 too agora.
“Ami nian bee posu nee bailoron naruk mak maran, maibe tempu udan nee bee la maran, nee bee posu tolu besik ami nian uma nee nakonu no ami la hadau malu, kuandu bailoron nee ami tenke hadau malu bee iha tempu kalan, dezde tempu Indonezia too mai ohin loron ami uza bee posu nee mak ba tein, hemu, haris no fase ropa,” dehan Marito ba jornalista STL liu husi telefone, Domingu nee (18/05/2025).
Marito dehan, komunidade neebe hela iha Zulo Knua nee husi Suku Zulo no aldeia haat nee mak hanesan Aldeia Lale, Obuk Mil, Zulo Tas no Leogol, maibe komunidade barak mak hela iha Zumalai Vila.
(jac)
