LAUTEM, STLTIMORLESTE.com – Husik tinan tuan 2024 ba tinan foun 2025 nuudar loron importante no loron edukasaun ba sidadaun sira iha mundu tomak, hodi hatene oinsa harii dame no domin iha sosiedade.
“Ita sente katak tinan tuan 2024 nuudar loron espesial neebe Maromak fo ba ita hodi halao atividade sira hotu, ohin loron too ona hodi ema hotu bele sente ba tinan foun 2025 nian neebe sai loron edukasaun ba ema hotu atu harii dame neebe nakonu ho domin,” dehan Padre Selebrante SDB, iha Jona Pastoral Fuoro, Amu Jolino Vieira, hafoin halo misa ba tinan tuan 2024, ba tinan foun 2025 nian iha Somotcho, Bauro, Tersa (31/12/2024).
Tuir Amu SDB nee, tinan ida fulan 12, semana 52, loron 365, sai loron neebe importante ba sarani sira iha mundu, atu harii dame no domin iha sosiedade, tanba nee husu obrigadu barak ba Maromak atu fo onra no kontente nafatin ba ema hotu hodi hetan moris saudavel.
Tanba nee loron foun ba tinan foun, atu hanorin ba ema hotu harii domin neebe iha pas no seguransa, hela iha fatin nee nakonu ho domin no dame nian, atu lolo liman ba malu, simu malu hanesan Maromak fo perdaun tomak ba ema hotu nia salan iha mundu tomak.
“Ita tenke simu tinan foun 2025, maibe keta haluha husik salan hirak neebe durante nee halo iha tinan tuan 2024 nian, atu lori hahalok neebe nakonu ho pas no seguransa iha sosiedade atu bele moris ho dame no domin iha mundu raik klaran,” nia tenik.
Entretantu Reprezentante Igreja Maria Auxiliadora dos Cristão iha Aldeia Somotcho, Olga fos Santos afirma, tinan foun 2025 nee nuudar loron importante ba ema hotu, hodi sente haksolok iha familia nia laran, liu-liu iha sosiedade nia laran, tanba tinan foun nee sempre selebra ho pas no seguru, nunee Maromak iha reinu lalehan bele fo perdaun tomak.
“Ita nuudar sarani iha mundu, husik tinan tuan, entrega sala hotu-hotu ba tinan tuan, atu moris fila-fali iha tinan foun, hahalok foun, liu-liu atu harii pas no seguransa, tanba Maromak presiza moris ho dame no domin nian,” nia sublina.
Tanba nee loron foun ba tinan foun 2025, sai loron importante no loron edukasaun ba ema hotu, hodi hanoin ba salan hirak neebe durante nee halo ba ema sai laran moras, sai odigadu, entrega hotu ba tinan tuan 2024, atu moris no buras fali iha tinan foun 2025, hodi harii pas no seguransa neebe nakonu ho grasa Maromak nian.
Tanba nee simu fali loron foun no tinan foun 2025, fiar katak sei nakonu ho ksolok moris nian, iha dame no domin neebe nakonu ho felisidade, hetan grasa wain Maromak nian, atu bele hetan moris saudavel, domin no dame iha familia no mos iha sosiedade.
(EST 1)
