DILI, STLTIMORLESTE.com – Tinan nee EAST Timor Coffee Institute (ETCI) la halao serimonia graduasaun ba estudantes finalista sira, tanba sei hein rezultadu akreditasaun husi ANAAA.
Kestaun nee hatoo husi Mateus Maia de Jesus hanesan Reitor ETCI ba STL liu husi telefone, Sesta nee (15/11/2024).
“Hau hanoin tinan nee ETCI la halao graduasaun, no ita adia ba tinan oin mak halo graduasaun ba ita nian finalista sira, ho razaun ida katak ita sei hein rezultadu akreditasaun neebe mak husi ANAAA halo tiha ona, nee duni ita sei hein rezultadu ida nee, tanba nee mak ita sei halo graduasaun iha tinan oin, tinan nee ita labele realiza graduasaun,” nia dehan.
Mateus hatete, ETCI iha fakuldade tolu nafatin seidauk muda no seidauk iha fakuldade foun rum, tolu nee mak too agora sei nafatin, nee mak hanesan fakuldade agrikultura, edukasaun no administrasaun.
Iha fatin seluk, Reitor ISC, Sebastião Perreira hatete, liga ba graduasaun ninia, Kristal seidauk hatama lista estudantes finalista ba MESSK, tanba estudantes balun sei halao hela ezame, bainhira remata sira sei hatama lista nee para forma komisaun organizador, hodi marka data ba iha graduasaun ninia.
(jac)
