DILI, STLTIMORLESTE.com – Tinan nee Gabinete Avaliasaun Lisensiamentu no Akreditasaun (GALA) seidauk simu pedidu foun husi eskola sira.
Asuntu nee hatoo husi Koordenador Gabinete Avaliasaun Lisensiamentu no Akreditasaun (GALA), Antonio Tomas Maia ba STL iha nia knaar fatin, Kuarta nee (22/01/2025).
“Tinan nee seidauk simu pedidu foun ruma husi eskola sira, maibe iha tinan kotuk mak simu ona pedidu. GALA nia knaar mak jere no koordena servisu lisensiamentu no akreditasaun eskolar koordenasaun ho inspesaun mak oinsa servisu hamutuk atu halo inspesaun ba eskola sira liga ho lisensiamentu no akreditasaun (vistoria), nunee bele garantia implementasaun prosedimentu sira hotu,” dehan nia.
Iha parte seluk, Diretor Servisu Edukasaun Munisipiu Ainaro, Patricio da Costa Magno hatete, eskola hirak neebe seidauk hetan lisensa no akreditasaun, nee eskola sira mak hatama pedidu ba ME liu husi GALA.
Nunee mos Diretor Servisu Edukasaun Munisipiu Liquica, Julio da Silva dehan, ME liu husi GALA mak halo divulgasaun, tanba sira mak halao lisensiamentu no akreditasaun ba eskola sira, purtantu ida nee sira nian kompetensia.
Entretantu Diretor Servisu Edukasaun Munisipiu Manatuto, Patricio da Cruz Quintão hatete, halo divulgasaun husi GALA nee importante, maibe eskola publiku sira iha Munispiu Manatuto nee balu hetan ona lisensa no akreditasaun? no balun mak seidauk.
“Halo divulgasaun husi GALA nee importante, maibe ita nian eskola publiku sira iha Munispiu Manatuto nee balu hetan ona lisensa no akreditasaun, no balu mak seidauk,” dehan nia.
(jac)
