DILI, STLTIMORLESTE.com – Tinan ida nee marka momentu istoriku ba Timor Leste nia aniversariu ba tinan 50 proklamasaun unilateral independensia.
Lia hirak nee hatoo husi Prezidente Republika Jose Ramos Horta liu husi nia dikursu abertura ba semana kultural Fitun Fest Internasional Timor Leste iha Palasiu Prezidensial Nikolao Lobato, Bairo Pite Domingu kalan (20/07/2025).
“Tinan ida nee mos marka momentu istoriku ida ba Timor Leste nia aniversariu ba dala 50 Proklamasaun Unilateral Independensia nian, iha 28 Novembru 1975 marka ida neebe simboliza soberania, dignidade no aspirasaun ita nia povu nian atu moris iha liberdade no dame nia laran. Kultura sempre prezente no ativu iha viajen ida-nee, hodi fo naroman ba luta, fo lian ba esperansa, no hametin identidade nasional iha dekada sira rezistensia nian,” dehan PR Horta.
Prezidente Republika hatete, nunee mos Timor nasaun maun-alin sira husi PALOP (Nasaun Afrikanu sira neebe Koalia Lian Portuges) mos selebra iha tinan ida-nee aniversariu ba dala 50 sira nia independensia nasional nian data memoravel sira korajen nian, autodeterminasaun nian, no rezistensia istoriku nian. Atu komemorasaun sira nee hametin liutan lasu unidade no solidariedade entre povu sira.
Aleinde nee Xefe Estadu mos hatete desportu mak lian universal ida. Ida nee halibur, eduka no transforma. Valor olímpiku sira kona-ba exelensia, amizade, no respeitu maka prinsípiu sira neebe ihakarak haree buras iha foin-sae sira nia leet.
(eme)
