DILI, STLTIMORLESTE.com – Prezidensia Republika (PR) ho IX Governu sai uma nain Natal ba povu hodi halibur komunidade oin-oin, hodi hametin espiritual unidade durante tempu Natal.
Tuir observasaun neebe mak STL hetan iha Domingu (22/12/2024), Prezidensia Republika hamutuk ho IX Governu Konstitusional halibur komunidade sira neebe mak iha Kapital Dili, hodi selebra Natal hamutuk iha Palasiu Prezidensia hodi hametin unidade no hametin fiar hodi simu Kosok Oan Jesus.
Selebrasaun hahu iha loron 12 Dezembru ho abertura ba Ezibisaun prezepiu hodi hamoris fila fali tradisaun Natal neebe apresiada iha nasaun, hamutuk ho feira merkadu lokal neebe vibrante.
Tinan ida nee Prezidensia fahe prezente Natal ba membru komunidade hamutuk 5.000, inklui labarik, faluk, ema ho nesesidade espesial, pasiente iha Hospital Nasional Guido Valadares (HNGV), Prizioneiru, Orfanatu no komunidade sira neebe kbiit laek.
Prezidente Republika Jose Ramos Horta dehan, importansia husi inisiativa ida Natal ba povu, hodi halibur hamutuk fahe domin hodi garante pas no estabilidade hodi simu Kosok Oan Jesus.
“Natal ba povu reprezenta espíritu lo-loos ita nia nasaun nian, tempu ida atu fo, fahe no halibur hamutuk nuudar nasaun ida, família ida. Liu husi selebrasaun ida nee, ita lolo ita nia liman ba sira neebe presiza liu, hodi garante katak ksolok Natal nian too iha ita nia komunidade nia leet no moris iha Timoroan hotu nia laran,” dehan Prezidente Republika.
Selebrasaun “Natal ba Povu” iha loron 22 fulan Dezembru aprezenta programa rua. Sesaun lokraik hahu iha tuku 13:30 ho atividade oin-oin neebe organiza ba labarik sira husi Alem Timor and Abut, inklui pinta oin, jogu ba labarik sira, no atividade artezenatu neebe halao iha jardín Palásiu Prezidensial, hamutuk ho feira Natal no ezibisaun prezepiu.
Labarik sira mos haksolok ho dansa kultural, knananuk Natal, espetakulu majiku no aprezentasaun moda espesial. Programa lokraik nian inklui mos atuasaun husi grupu oin-oin, inklui Grupu Biblioteka Prezidensial, Eskola Portugues, Grupu Filteda, Grupu Inkluzaun Sosial, no Grupu Milagre.
Programa kalan nian hahu iha tuku 18:00 ho serimonia boas-vindas simbolika ho tais tradisional neebe aprezenta husi Prezidente Ramos Horta no Primeiru Ministru Kay Rala Xanana Gusmão. Arsebispu Dom Virgílio lidera reflesaun Natal nian, tuir mai ho aprezentasaun espesial kona-ba inisiativa dezenvolvimentu rural Prezidensia nian.
Selebrasaun kalan nian inklui mos atuasaun husi Marvis Artist Band, artista Indonezia Sassando DJITRON PAH, Orkestra Berliku Lian, no Orquestra F-FDTL.
Selebrasaun nee konklui ho jantar komunidade nian neebe inklui churrasku fornese husi Prezidensia Republika, akompanha ho atuasaun muzikal husi artista Aida Belo no grupu entretenimentu oioin.
Prezidensia hatoo ninia agradesimentu ba doador no parseiru sira hotu neebe ajuda halo selebrasaun ida nee sai posivel. Sira nia laran luak hasae apoiu neebe fo ba komunidade no labarik sira durante tempu natal ida nee.
Eventu ida nee sublina Prezidensia no Governu nia kompromisu atu haburas espíritu komunitariu no garante katak, ksolok Natal nian too ba sidadaun hotu iha TL.
Iha selebrasaun nee marka prezensa husi Prezidente Republika Jose Ramos Horta ho ekipa, Primeiru Ministru, membru Governu korpu diplomatiku komunidade baibain no seluk tan.
(eme)
