BAUKAU, STLTIMORLESTE.com – Tinan nee Servisu Munisipal Obras Publikas (SMOP) Vikeke sei submete pakote estrada munisipal no rural hamutuk 15 ba nasional.
Diretor Servisu Munisipal Obras Publikas Vikeke, Casildo G. Soares hateten, daudaun ekipa Servisu Munisipal Obras Publikas Vikeke foti hela dadus ba pakote estrada munisipal no rural hamutuk 15 neebe sei submete ba nasional hodi nunee bele hetan aprovasaun no halo reabilitasaun fo fasilitasaun movimentu transporte publiku sira neebe kada loron transporta produtu lokal husi suku, postu ba iha nivel merkadu munisipal no nasional.
“Pakote 15 nee ita foti hotu husi Postu Administrativu 5 nee, Uatulari, Ossu, Vikeke, Lakluta, kuaze ita foti hotu, neebe estrada rural ho estrada munisipal balun,” hateten Casildo ba jornalista STL liu husi telefone, Segunda (21/07/2025).
Nia sublina, husi pakote estrada 15 kuaze kondisaun aat no grave, neebe kada tinan la fasilita movimentu komunidade sira ho transporte publiku no privadu.
Nia fundamenta, husi pakote 15 kobre ba kilometru estrada 40 resin neebe sei implementa iha Postu Administrativu sira hotu iha Munisipiu Vikeke neebe identifikadu ona.
“Nee ba estrada neebe grave loos difikulta ita nia komunidade sira. Ita hatoo ba nee estrada ho ponte kiik oan hanesan claver sira nee,” katak Casildo.
Diretor nee akresenta, estrada rural iha Munisipiu Vikeke hamutuk kilometru 373 neebe balun nee antes implementa ona no balun daudaun iha hela faze submete dadus ba nasional nunee kontinua tau prioridade ba kondisaun estrada sira iha Minisipiu Vikeke.
(tom)
