BAUKAU, STLTIMORLESTE.com – Magnifiku Reitor Institutu Superior Cristal, Sebastião Pereira informa, tinan oin Institutu Superior Cristal (ISC) sei aumenta kursu estudu.
“ISC iha planu atu aumenta fakuldade ho departementu balun neebe Governu la suspende, iha oportunidade bele loke,” hateten Sebastião Pereira ba jornalista STL iha Vila Nova, Baukau, Tersa (06/05/2025).
Nia sublina, kursu estudu neebe atu aumenta, husi kursu estudu neebe hetan ona akreditasaun, maibe haree mos nesesidade, tanba nee ekipa ISC halo ona estudu viabilidade iha munisipiu lima mak hanesan Munisipiu Lautem, Baukau, Manatuto, Maliana inklui Munisipiu Dili, neebe konsidera nuudar munisipiu pontensialidade ba agrikultura.
Nia fundamenta, planu aumenta kursu estudu mak fakuldade agrikultura ho departementu extensaun agrikola no seluk tan, tanba setor agrikultura mak aliserse ba ekonomia nasaun no bele produs estudante sira hodi kria kampu trabalhu ba aan rasik liu husi kuda, rai rezultadu kolheta hodi faan hetan rendimentu, maibe daudaun prosesu iha ona faze estudu viabilidade hodi hein implementa.
“Agora iha faze estudu viabilidade, kuandu hotu ami submete ba Ministeiru Ensinu Superior tuir lei data ikus liu 31 Maiu nee submete ona, kuandu liu ona ida nee ita rai ba tinan oin,” Sebastião Pereira akresenta.
Reitor nee deklara, bainhira faze estudu viabilidade remata, ISC sei submete karta ba Ministeriu Ensinu Superior iha dentru fulan Maiu tinan nee no bainhira hetan aprovasaun tinan oin (2026) sei hahu simu kandidatu estudante ba kursu estudu agrikultura.
Sebastião konfesa, prosesu aumenta kursu estudu agrikultura hetan apoiu masimu husi Ministeriu Agrikultura no Peskas neebe selebra ona memorandu intendimentu ho ISC inklui iha ona kooperasaun ho Instituto Agrikultura (Pertanyaan) Bogor Indonezia no Universidade balun husi Filipina atu apoiu, bainhira fakuldade agrikultura iha ISC estabelese ona.
(tom)
