DILI, STLTIMORLESTE.com – Governu Timor Leste liu husi Sekrerariu Estadu Arte no Kultura (SEAK) ho Ministeriu Komersiu no Industria (MKI), servisu hamutuk ho Ministeriu Edukasaun (ME) atu enkaixa Tais Kultura ba iha kurikulu nasional ba eskola filial sira too universidade.
Objetivu atu enkaixa Tais Kultural ba iha kurikulu nasional nee hanesan maneira mos atu salva guarda bele kuidadu no bele promove padrimonia kultural hanesan mos identidade ba jerasaun foun sira.
Sekretariu Estadu Arte no Kultura (SEAK), Jorge Soares Cristavão hatete, tinan oin Tais sei tama ba iha kurrikulu nasional eskolar no agradese ba Ministeriu Edukasaun ho ekipa tomak nia esforsu.
“Tinan oin Tais sei tama iha kurrikulu nasional eskolar, hakarak agradese no apresia ba Ministra Edukasaun ho ekipa tomak, liu-liu ba ekipa unidade Kurikulu, neebe mak servisu diak tebes, apoiu husi NATCOM, neebe mak prosesu halao hotu ona,” hateten Jorge Soares Cristavão bainhira partisipa iha Semonia Abertura Seminariu Nasional ho tema “Salva Guarda Tais Nuudar Pafrimonia Imaterial TL”, iha Salaun Delta Nova, Dili, Tersa (29/04/25).
Nia hatete, prosesu enkaixa Tais ba Kurikulu Nasional nee prosesu lao hela, ekipa sira husi NATCOM nuudar identidade ida neebe mak atu reavalia fila fali materia eskolar nian
Enkuantu iha Seminariu nee mos partisipa husi Eskola Bazika filial sira iha Munisipiu Dili akompanha husi Mestre sira inklui Grupu Soru nain sira, husi Munisipiu 13.
Iha fatin hanesan Ministeriu Komersiu no Industria(MKI), Filipus Nino Pereira hateten, Tais bele Tama iha Kurikulu Eskolar, bele mos enkaixa iha Fakuldade iha Universodade sira hodi sai hanesan Departementu ida, hodi estuda espesialidade ba Tais nian.
“Buat diak ida atu husik hela ba imi maka Tais ida nee, tinan oin tama ona ba iha Kurikulu, ita buka para aprende karik aban bainrua mos tama iha Universidade, iha Fakuldade Siensia Umaniora ka Siensia Edukasaun nian, atu sai mos hanesan Departementu Espesial ida atu estudu kona ba Tais nee,’ hateten Ministru Filipus Nino Pereira.
(est)
