DILI, STLTIMORLESTE.com – Deskonfia ema uza kilat hodi tiru sae no kilat musan monu kona Eis Prezidente Republika (PR), Francisco Guterres Lú Olo nia rezidensia, daudaun nee sei iha prosesu investigasaun nia laran, nomos Polisia Nasional Timor Leste (PNTL) liu husi Departamentu Investigasaun Kriminal (DIK) aprezenta ona ba Ministeriu Publiku (MP).
“Kilat musan nee atu mai husi ema sivil deskonhesidu ka husi PNTL ka husi Militar, ita seidauk bele hatete ida nee, tanba prosesu investigasaun sei lao hela, maibe 9 mil metru ita bele deskobre, depois nee husi kilat kiik ita hatene, maibe atu hatene tipu kilat husi neebe nee ita seidauk hatene,” hatete Xefe Departamentu Investigasaun Kriminal, Polisia Nasional Timor Leste (PNTL), Superintendente João Belo dos Reis ba jornalista sira iha Komando Jeral PNTL, Dili, Tersa (07/01/2025).
Situasan neebe akontese tuir nia iha loron 1 Janeiru, tuku 1:30 madrugada, wanhira Komunidade tiru fogetes no ema deskonhesidu mos tiru kilat musan, no kilat musan monu iha Eis Prezidente Republika, Francisco Guterres nia uma.
Nunee PNTL liu husi DIK aprezenta ona kazu nee ba iha Ministeriu Publiku (MP) ho NUC OO3/2025 PCIK. Tanba husu apoiu husi Parseiru sira atu halo ijame ba kilat musan neebe PNTL hetan.
Maibe PNTL sei halo investigasaun ba sidadaun sira neebe hala besik iha rezidensia Eis Prezidente Republika, Francisco Guterres Lú Olo.
Iha fatin ketak, Akademista UNTL Fakuldade Direitu, Novita Sari do Carmo esplika, PNTL tenke investiga klean ba ema deskonhesidu neebe uza arma hodi tiru rezidensia Eis PR Francisco Guterres Lu Olo nia, tanba ema neebe uza kilat la tuir lei no orden tenke prosesa tuir lei neebe vigor.
(jen)
