DILI, STLTIMORLESTE.com – Primeiru Ministru (PM), Kay Rala Xanana Gusmão hatete, nia admira ho kilat musan neebe mak tiru husi ema deskonhesidu ba Eis Prezidente Republika, Francisco Guterres Lú Olo nia rezidensia, tanba nia (Xanana-red) la kaer kilat. Maibe nia promete sei halo investigasaun hodi hatene motivu husi akontesimentu nee.
“Ami haree tiha ona, hau nee soldadu ida, hau la komprende kilat musan nee halo nusa, hau admira mak kilat musan sae ba leten tun fali mai, iha seluk mos hau rona ida nee, hau dehan imi mak diskuti atan oan nee soldadu la hatene kaer kilat, tan neebe la komprende buat nee,” dehan PM, Xanana ba jornalista sira, bainhira remata halo enkontru ho Prezidente Republika, Jose Ramos Horta iha Palasiu Prezidensial, Nicolau Lobato, Bairo Pite, Dili, Kinta (09/01/2025).
Primeiru Ministru, Kay Rala Xanana Gusmão hatutan, akontesimentu nee nia la ba haree, tanba fatin neeba seguransa metin.
“Seguransa metin, hau nunka tama husi dalan sira neeba, seguransa metin seguransa makaas, ita ba took haree,” katak PM.
Nunee mos hatan kona-ba Governu presiza iha pozisaun hodi haree ba asuntu nee, Xefe Governu dehan, iha tempu Portugues nia nuudar soldadu no gerilha lao ba mai subar aan deit.
“Neebe sira dehan tiru kilat musan ba leten monu tun fali, hau dehan sa kilat musan mak tiru sae ba leten tun fali mai rai, tenke investiga, hau tenke komprende buat ida nee, iha fali kazu ida seluk tiru kilat musan ba leten tama tiha iha uma tuun ba kraik labarik ida toba hela iha kama, hau dehan sa kilat musan mak hanesan nee, uluk hau sei kiik hau tama soldadu buat ida nee laiha, nee duni ita tenke hatene uluk buat nee nusa,” dehan Xefe Governu.
Entretantu foin lalais ema deskonhesidu balu iha kalan boot tuku 00:00 Oras Timor Leste (OTL) ka Kuarta Feira (01/01) uza arma tiru tama ba rezidensia eis Prezidente Republika, Francisco Guterres “Lu Olo”.
Kilat musan (bala real) neebe tiru tama ba rezidensia eis Prezidente Republika, fura husi kalen uma tun too kona meza neebe baibain eis titulares nee uza too rahun hotu. akontesimentu nee mosu, seguransa pssoal eis PR informa kedas ba Komando PNTL no F-FDTL, PCIC, PM, Intelijensia Milita no Polisia Forensik too kedas uma rezidensia hodi halo observasaun direita no halo investiga kona-ba faktu neebe akontese.
(eme)
