BAUKAU, STLTIMORLESTE.com – Mosu atake malu entre tiu ho subrinhu tanba hadau malu rai iha area Uainiki, Suku Bahu, Postu Administrativu Baukau Vila, Munisipiu Baukau, rezulta ema nain 3 hetan kanek.
Tuir Segundu Komandante Polisia Munisipiu Baukau, Superintendente Asistente Fasiu de Jesus Lima informa, asaun refere akontese iha loron 17 Outobro 2025 parte dader tiu inisial M.A.B nuudar membru Polisia Nasional Timor-Leste (PNTL) no subrinhu nain 3 hanesan D.M.F.D.C, R.A.L.D.S no S.A.G.S tuda malu iha area Uainiki, Suku Bahu Postu Baukau Vila, tanba hadau malu rai neebe rezulta subrinhu nain 3 refere hetan kanek.
“Vitima primeiru kanek iha kabas, ida kanek iha ain no ida kanek iha liman no bubu ain loos. Ita seidauk hatene loos iha neeba sira tuda malu automatikamente fatuk mak kona,” dehan Superintendente Asistente Fasiu de Jesus Lima ba jornalista sira iha knaar fatin Vila Nova Baukau, Segunda (20/10/2025).
Nia sublina, hafoin asaun nee akontese, Komando Polisia Munisipiu Baukau liu husi ekipa task force too kedas fatin akontesementu evakua membru Polisia refere, subrinhu sira inklui sasin nain ida ho inisial A.S.B hodi halo identifikasaun iha edifisiu Komando Polisia Munisipiu Baukau.
Nia fundamenta, ba asaun refere parte Komando Polisia Baukau seidauk prega autor ba sidadaun ida, tanba sei iha prosesu investigasaun.
“Prosesu investigasaun mak sei determina iha neeba, maibe iha vitima nain 3 nee testamunha nain ida no iha suspeitu neebe dehan katak membru PNTL, maibe akontesementu nee ita haree sira tuda malu laos ida mak sai vitima deit no suspeitu loos deit, tanba ida nee parte investigasaun sei halao investigasaun klean liu tan para bele hatene se loos mak autor,” nia tenik.
Mezmu nee, Komando Polisia Munisipiu Baukau liu husi Servisu Investigasaun Kriminal prepara ona dadus ba kazu refere atu rejistu iha Ministeriu Publiku hodi prosesu no foti medida ba kazu refere.
Jornalista: Tomas Reis
Editora: Domingas Gomes
