DILI, STLTIMORLESTE.com – Tribunal Judisial Primeira Instansia Dili (TJPID) kontinua halo debate instrusaun ba kazu atividade ilisitu ba droga neebe envolve husi arguidu nain 13 iha tinan 2022.
Iha sala julgamentu Juiz José Quintao deklara katak, kazu atividade ilisitu ba droga neebe envolve husi arguidu nain 13 iha tinan 2022, tenke kontinua ba iha julgamentu.
Juiz deklara, razaun kazu ida nee avansa ba julgamentu, tanba hafoin Tribunal verifika tiha faktus no provas sira neebe Ministeriu Publiku aprezenta ba iha akuzasaun, nunee Tribunal haree katak arguidu nain 13 iha indisiu envolve iha kazu droga.
Tanba nee Juiz deside kazu ida nee tenke avansa ba julgamentu.
Juiz deklara iha sala julgamentu katak, debate instrusaun ida nee ninian objetivu mak atu verifika faktus no provas sira neebe Ministeriu Publiku konsta iha akuzasaun, atu haree ida neebe mak prienxe hodi Tribunal bele avansa ba julgamentu, tanba nee Tribunal pronunsia katak, faktu no provas sira neebe konsta iha akuzasaun Ministeriu Publiku nian nee maioria valida hotu no iha balun mak nulu .
Juiz fundamenta iha nia desizaun katak, iha faktu balun mak Tribunal konsidera la provadu ka nulu mak momentu Servisu Nasional Intelejensia ba halo apreensaun buska domisiliariu ba arguidu balu nia rezidensia. No Tribunal konsidera katak momentu ekipa SNI ba halo apreensaun no buska domisiliariu iha arguidu nain rua nia rezidensia nee la ho mandadu judisiariu.
Tanba atu halo apreensaun buska domisiliariu ba ema nia rezidensia autormatikamente tenke bazeia ba mandadu Judisiariu, maibe momentu neeba ekipa Servisu Nasional Intelejensia ba halo aprensaun no buska iha arguidu nain rua nia rezidensia la ho mandadu.
Juiz deklara, Tribunal verifika tiha faktus no provas sira nee Tribunal konsidera nulu. No Tribunal haree tiha faktus sira no provas sira liu-liu objetu krime sira neebe momentu nee SNI foti iha arguidu nain rua nia rezidensia, Tribunal tetu hotu ida nee. Tanba nee liu husi desizaun ba debate instrusaun nee Tribunal deside prosesu apreensaun no buska iha arguidu nain rua nia rezidensia nee nulu.
Tribunal konsidera faktus no provas ida deit mak Tribunal konsidera nulu. Enkuantu faktu no provas sira seluk neebe Ministeriu Publiku halibur iha akuzasaun nee, iha indisiu ba krime droga. Ho nunee maka Tribunal deside hodi kontinua ba julgamentu.
Iha sala julgamentu bainhira Tribunal liu husi Juis José Quintao fo sai tiha desizaun ba debate instrusaun ba kazu droga nee, parte defeza husi arguidu sira laiha kontestasaun ba desizaun referida.
Antes nee Tribunal Judisial Primeira Instansia Dili halo debate instrusaun hodi rona sasin GMP, neebe momentu neeba nuudar Diretor iha Servisu Nasional Intelejente (SNI).
Sasin deklara, momentu neeba ekipa SNI hetan informasaun katak iha sidadaun balun suspeita halo atividade ilisitu droga, nunee SNI nuudar institusaun ba servisu nasional intelejensia tuir lei numeru 3/2009 neebe iha papel rekolha informasaun analiza no relata. Momentu nee SNI ezerse kedan papel hodi buka autor sira nee.
Sasin deklara, momentu neeba nia ekipa sira iha terenu kontaktu ba sasin, tanba nee sasin fo ordem atu asegura arguidu sira nee. Maibe sasin deklara, tuir regra kazu sira hanesan nee kuandu identifika ona, tenke lori kedan ba iha PSIK hodi halo investigasaun, labele tau iha SNI.
Debate instrusaun ba kazu droga neebe mak envolve husi arguidu nain 13 neebe akontese iha loron 12 fulan Agostu 2022, prezide husi Juiz José Quintao, Ministeriu Publiku reprezenta husi Prokurador Matias Soares no argudu sira hetan asistensia legal husi Defensor Publiku no Advogadu Privadu.
(ter)
