DILI, STLTIMORLESTE.com – Tribunal Judisial Primeira Instansia Dili (TJPID) halao prosesu primeiru interogatoriu ba arguidu ho insial D, tanba deskonfia naok telefone iha area Bekora, iha loron 7 fulan Dezembru tinan 2025.
Arguidu lori mai iha Tribunal, no parte Ministeriu Publiku (MP) promove arguidu ho krime Furtu Agravadu neebe previstu iha artigu 252 husi kodigu penal Timor Leste.
Juiz turnu, Fransisca Cabral halo tiha indentifikasaun ba arguidu, no submete kedan ba iha faze alegasaun husi Ministeriu Publiku no mos Defeza arguidu nian.
Iha alegasaun Prokurador, Domingos Barreto husu Tribunal atu aplika medida koasaun Prizaun Preventiva (PP) ba arguidu, tanba arguidu nain-rua halai lakon, no motorizada neebe mak arguidu sira uza nee, arguidu inisial D nian.
No parte Defeza, husu ba Tribunal atu aplika Medida Aprezentasaun Periodika ba arguidu.
Rona tiha alegasaun husi parte rua, ikus mai Juiza turnu Fransisca Cabral, hasai despaisu hodi deside aplika medida Prizaun Preventiva (PP) ba iha arguidu, hodi asegura prosesu investigasaun.
Prosesu primeiru interogatoriu nee, prezide husi Juiza Turnu, Fransisca Cabral, Ministriu Publiku reprezenta husi Prokurador, Domingos Barreto, no arguidu hetan asistensia legal husi Defensor Publiku Estajiariu, Emilio Ribeiro.
Jornalista: Terezinha De Deus
Editora: Carme Ximenes
