DILI, STLTIMORLESTE.com – Tribunal Judisial Primeira Instansia Dili (TJPID) iha loron Kuarta, halao Julgamentu ba arguidu ho naran inisial AN, tanba halo krimi ofensa ba integridade fizika simples ho forma violensia domestika hasoru lezada ho inisial MS.
Tuir akuzasaun neebe iha katak, iha loron 1 fulan Marsu tinan 2024, haleu oras tuku 20:30 otl, iha Komoro, Dili, arguidu AN lori karger telemovel nian ida hodi baku kona iha ofendida nia matan fukun sorin karuk ho makaas no lori liman loos tuku dala ida kona iha ofendida nia ren tos ho makaas.
Konsekuensia direta husi arguidu nia hahalok ofendida hetan moras iha matan fukun, bubu no metan, moras iha ren tos, oin nakukun too telemovel monu husi liman mos ofendida la senti.
Kauza hosi problema nee, tanba ofendida ba servisu atu fila ba uma, maibe sei hein sira simu sira nia salariu iha patraun mak fila ba uma tarde.
Antes, arguidu pratika ona ofensa ba integridade fizika hasoru ofendida rejistu ho NUK 0216/20.DICMR. Arguidu AN halo ho forma livre, deliberada no konsientemente, hatene katak, lori carger telemovel nian ida hodi baku kona iha ofendida nia matan fukun sorin karuk ho makas, no lori liman loos tuku dala ida kona iha ofendida nia ren tos ho makaas, nuudar meiu neebe aptu hodi hamosu ofensa ba lezada nia isin lolon no saude.
Arguidu hatene katak, nia hahalok nee proibidu no punidu tuir lei penal. Tanba nee, Konstitui arguidu AN nuudar autor material ho forma konsumadu ba pratika krimi ofensa ba integridade fizika simples ho forma violensia domestika 1 (ida), previstu no punidu tuir art. 145º husi Kodigu Penal konjuga ho artigu sira 2, 3 alinea a) no art. 350 alinea b) hosi Lei Kontra Violensia Domestika n.°07/2010, loron 07 fulan Julhu.
Iha audensia julgamentu arguidu deklara ba Tribunal katak, iha momentu neeba arguidu la baku lezada, maibe arguidu basa deit lezada nia hasan parte los ho nunee lezada telefone ba nia bin, nunee sira nain rua ba halo keixa iha kantor polisia. Depois de keixa hotu lezada ho nia bin fila ba uma, arguidu haruka lezada lori nia oan ba fali nia nin nia uma.
Liu tiha fulan ida mak arguidu bolu fali lezada atu fila ba uma, tanba arguidu haree nia oan la tama eskola kuaze fulan ida ona.
Arguidu deklara, objetivu husi problema nee, tanba lezada sai servisu tarde no laiha informasaun ruma husi lezada, arguidu telefone lezada dala ida la foti no Arguidu tenta tan mak lezada foti telefone, no Arguidu husu tanba saida mak oras nee mos seidauk fila servisu, lezada responde arguidu katak foti osan hotu mak atu fila ba uma no Arguidu atu ba foti lezada, no lezada lakohi tanba nia kolega mak atu lori nia fila ba uma, ho nunee mak arguidu nervozu hodi basa lezada nia hasan parte los.
Antes nee arguidu ho lezada mai hatan ona Tribunal, tanba arguidu baku lezada no kazu nee desizaun hotu ona iha tinan 2020.
Lezada mos haforsa tan akuzasaun neebe iha katak, arguidu halo duni agresaun ba lezada.
Rona tiha ida nee, iha alegasaun husu Tribunal kondena arguidu fulan 8 prizaun, suspende ba tinan ida. Defeza husu Tribunal aplika pena neebe justu.
Rona tiha alegasaun, tribunal adia ba loron seluk hodi rona desizaun.
Audensia julgamentu nee prezide husi Juis Singular Ercilia de Jesus Ministeriu Publiku reprezenta husi Prokurador Napoliao Soares da Silva, arguidu hetan asistensia legal husi defensoria publika Sebastiao Amado.
(ter)
