DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial JdS, tanba komete krimi hasoru lezada inisial DA hanesan feen.
Iha faktus, tuir akuzasaun katak, arguidu JdS ho lezada hela no moris hamutuk iha uma ida nuudar feen ho laen dezde tinan 2020.
Durante forma sira nia familia, lezada ho arguidu kous oan feto rua, ekonomikamente depende ba arguidu.
Iha loron 17 fulan Novembru tinan 2024, oras tuku 01:30 madrugada, arguidu halo agresaun fizika hasoru lezada iha uma Beto, Dili.
Motivu husi problema, tanba arguidu atu foti sira nia oan ho idade fulan sanulu no lezada lakohi fo mak halo arguidu nervozu hodi halao kedas agresaun fizika hasoru lezada.
Momentu neeba arguidu hodi nia liman tuku dala ida ho makaas kona iha lezada nia matan parte karuk, halo lezada sente moras mak lezada hakilar hafoin arguidu halai ses tiha husi fatin.
Konsekuensia husi agresaun arguidu nian, lezada sente moras, tanba bubu ho metan iha nia matan parte karuk lezada ba halo tratamentu saude.
Katak agora daudaun lezada ho arguidu diak malu no hela hamutuk nafatin iha sira nia uma.
Arguidu halo ho forma livre, ho depropozitu halo agresaun fízika hasoru lezada DA nuudar arguidu nia kaben, katak aktus mak arguidu halo hasoru lezada, konsidera hanesan meiu ida hodi halo moras ba lezada nia isin, tuir buat neebe mak hakerek ona iha leten.
Hahalok arguidu nian ho konsiensia rasik no hatene katak hahalok nee lei bandu, maibe arguidu halo nafatin.
Ho hahalok sira nee, konsidera arguidu JdS hanesan autor material ho forma konsumadu, Pratika krime ida, Violensia Domestika, tuir artigu 3, 35 al. b) husi Lei n° 7/2010, ho forma ofensas integridade fizika simples, tuir artigu 145, husi Kodigu Penal.
Hatan ba akuzasaun, arguidu konfesa imprasial ba faktus katak, akuzasaun neebe Tribunal lee sai los hotu no daudaun nee arguidu ho lezada diak malu ona.
Arguidu deklaran, problema nee liu loron haat arguidu husu deskulpa ba lezada no sira diak malu.
Arguidu mos arepende ho nia hahalok no nia promete katak iha futuru sei la halo tan.
Lezada mos deklara, momentu neeba arguidu tuku dala ida kona lezada nia matan fukun. Lezada deklara katak, problema nee liu loron haat arguidu husu deskulpa no sira diak malu ona.
Rona tiha parte rua, Tribunal husu Ministeriu Publiku atu tama ba iha alegasaun.
Iha alegasaun Prokurador Aderito Tilman husu ba Tribunal atu tetu sirkutansia sira no aplika pena multa ba arguidu.
Enkuantu parte Defeza husu ba Tribunal atu aplika pena multa neebe adekuadu.
Rona tiha parte rua, Tribunal adia ba loron seluk hodi rona desizaun.
Audensia julgamentu nee prezide husi Juiz singular José Quintão, Ministeriu Publiku reprezenta husi Prokurador Aderito Tilman, arguidu hetan asistensia legal husi Defensor Publiku, José Maria Guterres.
Jornalista: Terezinha De Deus
Editora: Carme Ximenes
