DILI, STLTIMORLESTE.com – Prezidente Republika (PR) Jose Ramos Horta hatete, Timor Leste (TL) mak asumi Prezidensia Comunidade dos Países de Língua Portuguesa (CPLP), tanba nee husu Governu nomeia delegasaun neebe iha esperiensia atu lidera.
Prezidente Republika Jose Ramos Horta hatoo kestaun nee ba jornalista sira iha Aeroportu Internasional Nicolau Lobato, Komoro, Sesta (06/02/2026).
PR hatete, Prezidente Timor Leste mak asumi Prezidensial CPLP, tanba nee ema neebe ba tenke iha esperiensia.
Aleinde iha informasaun katak, Governu nomeia Ministru Defeza Contra Almirante Donanciano Gomes Pedro Klamar Fuik ho delegasaun mak sei ba, oinsa Prezidente nia haree ba ida nee, hatan ba kestaun nee Prezidente Republika hatete, delegasaun neebe hili ema ho esperiensia no Komodoro mak lidera tanba ho estatutu Contra Almirante aas liu Komodoro.
“Delegasaun neebe ba hili ema ho esperiensia. Importante Komodoro Pedro Klamar Fuik mak lidera, tanba estatutu nuudar Contra Almirante aas liu Komodoro. Nunee halo dialogu hanesan estatutu ho militar sira iha Gine-Bisau,” dehan Prezidente Republika.
Xefe Estadu Ramos Horta dehan, Primeiru Ministru iha influensia makaas iha Gine-Bisau, “Maun boot Xanana rasik, hau koalia maun boot Xanana, se maun boot Xanana bele ba karik nee sira rona. Maibe nee gasta tempu boot, viajen deit ba, mai semana ida nia laran atu too iha Gine-Bisau pelumenus loron rua, fila hamutuk hotu diferensia orariu loron tolu. Timor mak asume Prezidensia CPLP sira hotu-hotu konvida ita, konfia ba todan nee, nee duni hau apoiu 100% delegasaun nee ba,” dehan PR Horta.
Xefe Estadu hatete, Tomas Cabral konhese situasaun eleisaun prosesu buat sira nee, maibe Prezidente lakohi komenta tan buat seluk, tanba situasaun komplikadu delikadu.
“Hau espera katak, sira rona mensajen rekomendasaun husi ita nia Governu, tanba nee ba interese povu Gine-Bisau nian, situasaun difisil tebes-tebes ba povu iha Gine-Bisau, maibe Timor Leste gasta ona osan lubuk ida ho Gine-Bisau. Nee duni buat sira nee mos Governu tenke sukat didiak,” katak nia.
Aleinde nee instituisaun barak aluga edifisiu ho orsamentu boot, fo prejuizu ba orsamentu ka lae, hatan ba kestaun nee Prezidente Republika hatete, nia la hatene edifisiu saida mak Governu aluga.
“Hau la hatene edifisiu saida mak Governu aluga, iha rai barak Governu aluga edifisiu ema nian. Presiza duni aluga, agora mak tenke negosiasaun makaas se mak aluga nee. Nunee labele aproveita karega todan, se aluga ka la aluga Governu mak hatene, Governu presiza aluga nee laiha problema,” dehan PR Horta.
Xefe Estadu dehan, agora tenke haree ho ema sira nee, neebe aluga keta aproveita, Prezidente mak halo karik negosiasaun sira husu karun.
“Hau dehan entaun imi nia edifisiu mamuk ba, imi bele hatama manu ruma iha laran, sira mos presiza aluga osan tama. Agora aproveita balun karun demais ita labele simu,” nia hakotu.
(eme)
