DILI, STLTIMORLESTE.com – Nasaun barak iha mundu inklui mos Timor Leste (TL) atinji ona igualdade asesu ba iha edukasaun.
Haktuir Reprezentante Internasional Finance Corporation (IFC) iha TL, David Freedman liu husi diskursu iha eventu organiza Premiu Feto Emprendedora TL 2024 iha salaun Multi Uzu Bebora, Tersa nee (19/11/2024).
Nia hatete, nia mos hanoin situasaun uluk bainhira iha tempu nia bin no inan sempre iha diskriminasaun ba feto, entaun ba oin presiza iha oportunidade entre oan feto no oan mane.
“Nee ba futuru neebe seidauk akontese, maibe pelumenus bele haree situasaun no realidade neebe akontese agora, hahu parte edukasaun nia ita bele haree katak nasaun lubuk ida inklui TL atinji ona igualdade iha asesu edukasaun, nomos iha nasaun balun too ona nivel universidade feto mak barak kompara ho mane,” katak nia.
Nia afirma, husi edukasaun hakat ba iha politiku, iha nasaun oin-oin inklui mos TL deputada barak mai husi feto, no ministra husi feto, no nasaun balun Primeiru Ministru husi feto no nasaun India mos Prezidente husi Feto.
Nia hatutan, iha area servisu negosiu nia bele haree katak maske iha ona progresu balun sei iha dezafiu lubuk ida, hahu husi parte serbisu nia too agora ema barak hanoin katak serbisu feto nia balun mane labele halo, maibe iha parte balun feto ho mane halo serbisu neebe hanesan, mais salariu lahanesan nee razaun saida, nee diskriminasaun.
Nunee mos Feto Potensial, Maria Milena Pires hatete, bainhira koalia kona-ba advokasia ba empoderamentu feto nia importante tebes.
Nia hatutan, koalia kona-ba empoderamentu feto, liu-liu foinsae sira aspektu neebe krusial tebes ba apoiu no treinamentu, nunee sira bele hakat ba oin ho konfiansa bele realiza potensialidade tomak.
(eme)
