DILI, STLTIMORLESTE.com – Timor Leste (TL) depende deit ba Fundu Petroliu, tanba nee governu presiza diversifika ekonomia iha rai laran hodi hamosu fonte rendimentu foun.
Atu Timor Leste labele depende demais ba Fundu Minarai, Xefe Bankada FRETILIN, Aniceto Guterres hatete, hakarak ka lakohi tenke diversifika ekonomia, save ba diversifika ekonomia nee mak Ministériu Turizmu Komersiu Industria sira nia servisu. Maibe buat nee laos buat foun, bele dehan muka lama.
“Iha buat barak neebe presiza dezenvolve, neebe bele produs hodi esporta. Hau fo ezemplu hanesan Bambu ka Au, nee konforme háu lee livru sira nunee mos tekniku sira esplika katak Au nee ita kuda ho trata diak nee tinan 5 bele produs”, hatete Deputadu Aniceto Guterres iha audensia publiku Orsamentu Jeral Estadu 2025 iha PN, Dili, Segunda nee (21/10/2024).
Tanba tuir Xefe Bankada FRETILIN nee, merkadu ba Au nee laos Au neebe transforma ba aikabelak, nee agora hadau malu deit.
Timor Leste iha instituisaun Bambu ida neebe primeiru governu harii, maibe produtu saída mak halo too agora.
Parese prosesu dezenvolve hela, maibe iha area ida nee esportasaun laiha. Se hakarak atu substitui durante nee Timor depende ba importasaun. “Háu hanoin Au nee mos hanesan potensia ida, maibe ita atraza ona, se kompara primeiru Governu harii instituisaun Bambu nian, agora sai tiha ona institutu, independent, autonomo, maibe laiha rezultadu, tanba nee tenke tau matan diak”, tenik nia.
Maibe nia dehan, Governu liu-liu Ministériu Turizmu no Komersiu mai dezenvolve diak pontensia sira, iha Timor nee mak trata Au ho diak, tinan 5 produs tinan 6 ka 7 bele esporta.
Nee komesa oituan-oituan, substitui ona importasaun, maibe jestaun deit mos lá adekuadu sei hasai husi nee. Au nee laos hanesan aiteka, kleur, maibe Au nee lais liu.
Hatan ba Kestaun nee, Visi Primeiru Ministru, Kalbuadi Lay katak, kona-ba Bambu tenke kompete liu husi trandisaun, bambu tradisional agora nee loos, iha jestaun iha neeba ladun masimu tanba iha mudansa balu.
“Saida mak ita koalia ba Bambu, ita tenke hatene Bambu iha mundu, atu halo industrializasaun bele maibe tenke investe lubuk ida, investe ba tekniku sura atu estuda. Bambu neebe diak liu primieru, Xina, Thailandia, besik mos Indonezia, Laos, Vietnam, neebe tenke haruka ema sira ba estuda iha neeba nunee fila mai haree duni ba area industrializasaun”, katak nia.
Governante nee dehan, se kada Munisipiu bele kuda Bambu 100 tinan 5 mai bele produs ona, maibe Bambu nian ida neebe kualidade bele sai industrializasaun nee laos tinan 5, maibe presiza tinan 10 too 15, tanba presiza Bambú neebe tuan, neebe Bambu neebe bele tama iha industrializasaun nee bele dura too tinan 50.
(gui)
