DILI, STLTIMORLESTE.com – Timor Leste (TL) kontinua hametin kooperasaun ho nasaun internasional nuudar ai-riin fundamental ba estabilidade dezenvolvimentu nasional.
Prezidente Republika Jose Ramos Horta dehan, TL sei hametin kooperasaun internasional no parseria estratejiku sira.
“Kooperasaun internasional vital no invitavel atu hametin TL nia kapasidade nasional, liu-liu iha domíniu defeza no seguransa, neebe nuudar ai-riin fundamental ba estabilidade no dezenvolvimentu nasaun nian,” dehan Prezidente Republika Jose Ramos Horta, liu husi nia diskursu iha selebrasaun Aniversariu FALINTIL ba dala 50 iha Tasi Tolu, Kuarta (20/08/2025).
Horta hatete, kolaborasaun estratejiku ida-nee relevante liutan iha kontestu Timor nia integrasaun tomak iha ASEAN, neebe nia arkitetura inklui pilar polítiku seguransa neebe metin, neebe foka ba promosaun pas, seguransa no kooperasaun entre estadu no membru sira.
Xefe Estadu hatete, TL hetan benefísiu husi apoiu, no parseria husi nasaun belun oin-oin, estadu membru ASEAN no parseiru importante sira seluk hanesan Australia, Brazil, Xina, Korea-Sul, Estadus Unidus Amerika, Índia, Japaun, Nova Zelandia no Portugal. Belun sira-nee kontribui makaas ba formasaun teknika, interkambiu militar, doasaun no programa formasaun ba forsa armada no instituisaun seguransa sira.
Kooperasaun nee esensial ona ba dezenvolvimentu Forsa Defeza Timor Leste nian no ba konsolidasaun kapasidade institusional nesesaria neebe prepara diak liutan atu hasoru dezafiu seguransa kontemporanea sira, hahu husi defeza territorial too kombate krimi transnasional no fo apoiu iha situasaun kalamidade sira nian.
(eme)
