DILI, STLTIMORLESTE.com – Timor Leste (TL) ho Bulgaria estabelese kooperasaun xave iha kuidadu saude, agrikultura no teknolojia.
Prezidente Republika, Jose Ramos Horta halo istoria vizita ofisial dahuluk ba Bulgaria tuir konvite husi Prezidente Bulgaru Rumen Georgiev Radev. Prezidente espresa nia agradesimentu klean ba konvite no destaka signifikadu husi enkontru bilateral dahuluk entre nasaun rua nee maske sira nia distansia jeografika.
Diskusaun sira foka ba area xave tolu kooperasaun nian mak hanesan edukasaun, partikularmente haruka estudante medisina Timoroan sira ba estuda iha Bulgaria, dezenvolvimentu agríkola ho enfaze ba seguransa ai-haan, hodi aproveita pratika agríkola modernu sira Bulgaria nian no kolaborasaun defeza liu husi Akademia Naval Bulgaria nian neebe hetan konsiderasaun aas.
Prezidente Bulgaria mos hatoo konvite ba joven Timoroan sira atu halao estudu iha setor IT neebe avansadu iha Bulgaria.
Prezidente Ramos Horta liu husi Komunikadu Neebe STL asesu husi media Prezidensia Republika kuarta nee (23/04/2025) sublina katak, maske iha distansia jeografika entre nasaun rua nee, vizita ida nee sei hametin kooperasaun ba benefísiu mutuo nasaun rua nian.
Prezidente mos fahe perspetiva sira kona-ba dinamika Uniaun Europeia no polítika rejional durante enkontru no mensiona planu sira atu diskute ho Primeiru Ministru Timor Leste nian kona-ba haruka ekipa ida ba Bulgaria hodi esplora oportunidade edukasionál no formasaun sira nee.
“Envolvimentu diplomatiku importante ida nee loke odamatan foun ba Timor Leste bainhira nasaun neebe dezenvolve hela hanesan ita buka atu habelar nia parseria internasional sira no harii kapasidade iha setor krítiku sira inklui kuidadu saude, agrikultura, defeza no teknolojia,” katak PR Horta.
(eme)
