DILI, STLTIMORLESTE.com – Eis Embaixador Amerika ba Timor Leste, Grovee J. Ress hatete, Timor Leste oras nee iha mudansa ba dezenvolvimentu kompara ho tempu uluk.
Eis Embaixador Amerika ba Timor Leste, Grovee J. Ress hatoo kestaun nee ba jornalista sira bainhira remata hasoru malu ho Prezidente Republika Jose Ramos Horta iha Palasiu Prezidensial Nikolao Lobato Bairo Pite, Segunda (26/05/2025).
Eis Embaixador hatete, uluk kareta no motor oituan deit no edefisiu boot ladun iha maibe ohin loron kareta motor barak, no edefisiu boot barak ona iha sidade kompara ho tempu uluk.
“Hau ladun peritu kona-ba dezenvolvimentu, maibe hau haree no vizita dala barak talvez tinan ida dala ida hau sempre haree kareta barak liu duke antes no edefisiu barak no boot barak duke antes nee bele sai diak oituan,” katak Eis Embaixador.
Nia mos iha rekomendasaun katak atu dezenvolve ba oin presiza jere husi setor pribadu hodi haree no konsentra ba atividade neebe importante sira.
“Tuir hau nia hanoin atu dezenvolve tuir maneira diak tenke haree setor privadu mak konsentra atu halo buat neebe povu Timoroan presiza, iha rai barak iha mundu rai klaran iha setor privadu maibe setor privadu faan sasan ba Governu deit nee ladun diak nee laos hanesan setor privadu hidrofoniko,” katak nia.
Eis Embaixador hatete, tuir nia haree Governu no instituisaun publiku hotu hakarak atu hadia povu nia moris maibe susar atu implementa.
“Hau iha konfiansa ba Governu Timor nia, Prezidente Timor nia, hakarak instituisaun publiku hotu-hotu serve povu maibe susar atu implementa,” katak nia.
Oinsa Embaixador nia haree kona-ba dezenvolvimentu Timor Leste ohin loron kompara ho tempu uluk, hatan ba kestaun nee Eis Embaixador dehan nia labele respsota klaru tanba lian tetun barak nia haluha ona tanba hela kleur ona iha Amerika, tanba nee barak nia haluha ona, maibe tuir nia haree Timor iha ona mudansa ba dezenvolvimentu.
“Hau hanoin iha dezenvolvimentu maibe hau iha Timor semana ida deit, tanba nee labele haree hotu dezenvolvimentu hotu-hotu diak maibe haree balun dezenvolvimentu lao diak ona, hau haksolok tanba talvez iha osan barak liu iha Timor agora duke antes, maibe importante harii sistema edukasaun, saude, importante mak Governu hadia povu nia moris, ida nee mak importante,” katak nia.
Iha biban nee nia mos husu Governu atu tau atensaun ba sistema edukasaun, saude iha Timor Leste nunee povu sira bele asesu ho diak hodi fo moris dignu ba povu Timoroan sira.
(eme)
