DILI, STLTIMORLESTE.com – Timor Leste (TL) ho India sei kontinua hametin liu tan relasaun no kooperasaun bilateral ou diplomatika entre nasaun rua iha futuru.
Tuir Sekretariu Jeral Ministeriu Negosiu Estranjeiru no Koperasaun MNEK, João Camara ba jornalista sira iha Palasiu Prezidensial Nikolao Lobato, Bairo Pite, Kuarta (14/05/2025) hatete, ohin loron importante ba TL tanba dahuluk TL loke embaixada iha India hahu relasaun diplomatika ho India.
“Primeiru ves ita haruka ita nia Embaixador ba reprezenta ita nia nasaun reprezenta sua exelensia Prezidente Republika iha India nee avansu ida tan ba TL nia relasaun diplomatika habelar liu tan ita nia relasaun diplomatika ho mundu,” katak nia.
Nia hatete, India nasaun neebe importante, nasaun boot iha ASEAN, tanba nee ba TL hakat boot ida ba oin, ho reprezentante Embaixador Karlito ba iha neeba hein katak relasaun iha area seluk.
“Ho India bele dezenvolve no hametin relasaun diplomatika ita nia relasaun amizade ho ita nia nasaun boot India,” katak nia.
Nunee mos Embaixador TL ba India, Karlito hatete, relasaun bilateral Timor Leste ho India hahu kedas 24 Janeiru 2003 kleur tiha ona, hametin liu tan bainhira exelensia Primeiru Ministru Xanana Gusmão ho Primeiru Ministru India halao enkontru iha simeira durante ASEAN iha Jakarta koalia oinsa hametin relasaun.
Embaixador dehan, momentu neeba koalia hamutuk oinsa mak India loke embaixada iha Timor Leste no Timor mos loke embaixada uha Dely.
“Lider nain rua koalia atu loke embaixada iha Dili nomos iha Dely para hametin tan koneksaun no relasaun metin liu tan, depois tuir tan ita hatene katak janeiru 2024 Exelensia Prezidente Republika mos partisipa no vizita ofisial ida enkontru ho Primeiru Ministru Mody iha Global Samit koalia kona-ba Pontus importante neebe sei halo kooperasaun mutua interese ba Futuru,” katak Embaixador.
Nia hatete, durante nia mandatu sei buka kontinua hametin kooperasaun entre TL ho India ba oin nafatin tanba India nasaun neebe boot iha ASEAN.
Nunee mos Prezidente Republika Jose Ramos Horta dehan, Timor Leste ho India mantein relasaun bilateral neebe forte dezde estabelese relasaun diplomatika iha 24 Janeiru tinan 2003, kolabora iha setor defeza, edukasaun, saude, agrikultura no kultural. Relasaun sai metin liu tan iha 2024, marka ho partisipasaun Prezidente Ramos Horta iha Simeira Global Vibrante Gujarat iha fulan Janeiru, iha neebe Prezidente hasoru malu ho Primeiru Ministru Modi hodi diskute kooperasaun iha petroleu, gas, dijitalizasaun, no interkambiu edukasional.
Prezidente dehan, momentu diplomatiku ida nee kontinua ho vizita estadu istoriku dahuluk husi Prezidente Índia nian mai Timor Leste iha Agostu 2024, tuir ho nasaun rua estabelese misaun diplomatika permanente Timor Leste loke nia embaixada iha New Delhi iha fulan Outubru tinan 2024 no Índia estabelese nia embaixada iha Dili iha fulan Setembru tinan 2024 hatudu sira nia kompromisu ba malu atu hametin liu tan relasaun bilateral no apoia Timor Leste nia envolvimentu ho ASEAN.
(eme)
