DILI, STLTIMORLESTE.com – Timor Leste ho India sei hametin lasu Amizade no reforsa kooperasaun entre rai rua iha futuru.
Kestaun nee hatoo husi Ministru Negosiu Estranjeiru no Kooperasaun (MNEK), Bendito Freitas ba jornalista sira, bainhira remata akompanha Prezidente Republika, Jose Ramos Horta neebe simu karta kredensial husi Embaixador India mai Timor Leste, iha Palasiu Prezidensial, Nicolau Lobato, Bairo Pite, Dili, Tersa (08/04/2025).
Nia dehan, Prezidente Republika simu karta kredensial husi Embaixador India mai Timor Leste, ofisialmente reprezenta ona xefe misaun diplomatiku India nia mai Timor Leste, ida nee komprimenta ba promesa neebe hatoo husi Primeiru Ministru India nian, iha simeira ASEAN iha Jakarta neebe promete katak sei loke Embaixada India iha Timor Leste.
“Nunee mos ita Timor Leste hahu ona loke ita nia Embaixada India ho Senhor Francisco Maukuru neebe halo servisu halo instalasaun Embaixada nia neebe agora prontu, ho ida nee garante diak liu tan ita nia kooperasaun bilateral reforsa lasu kooperasaun entre TL ho India,” katak governante nee.
Nia dehan, India nasaun neebe potensial tebes ba teknolojia ba medisina, farmasiatika ba inovasaun ba agrikultura, buat barak, ho ida nee mak hanoin importante tebes abertura ofisial Embaixada India iha Timor Leste fo tan konfiansa garantia ba koperasaun parseria estratejika entre Timor Leste ho India.
“Nee mak ohin lokraik nee Embaixador India hatoo ona karta kredensial, ita nia Prezidente simu ona, espera katak ba oin Prezidente mos promete apoiu masimu ba Embaixador India nia servisu iha TL, atu dudu no hatoo mos rezultadu konkretu ba ninia misaun iha TL,” katak Ministru.
Nunee mos Prezidente Republika, Jose Ramos Horta hatete, Timor Leste ho India mantein relasaun bilateral neebe forte dezde estabelese relasaun diplomatika iha 24 Janeiru tinan 2003, kolabora iha setor defeza, edukasaun, saude, agrikultura no kultural.
Relasaun sai metin liu tan iha 2024, marka ho partisipasaun Prezidente Ramos Horta iha Simeira Global Vibrante Gujarat iha fulan Janeiru, iha neebe Prezidente hasoru malu ho Primeiru Ministru Modi hodi diskute kooperasaun iha petroleu, gas, dijitalizasaun, no interkambiu edukasional.
Momentu diplomatiku ida nee kontinua ho vizita estadu istoriku dahuluk husi Prezidente India nian mai Timor Leste iha Agostu 2024, tuir ho nasaun rua estabelese misaun diplomatika permanente, Timor Leste loke nia embaixada iha New Delhi iha fulan Outubru tinan 2024 no India estabelese nia embaixada iha Dili iha fulan Setembru tinan 2024, hatudu sira nia kompromisu ba malu atu hametin liu tan relasaun bilateral no apoia Timor Leste nia envolvimentu ho ASEAN.
Timor Leste hein atu kontinua kooperasaun forte ho Republika India iha Embaixador Ghildiyal nia lideransa.
(eme)
