DILI, STLTIMORLESTE.com – Timor Leste (TL) sei sai uma nain ba ronda da-huluk negosiasaun Fronteira Maritima ho Indonezia iha Dili, neebe hahu husi loron 19 too 20 Agostu tinan 2025.
Tuir nota komunikadu imprensa neebe STL asesu husi media Gabineti Primeiru Ministru (M-GPM), iha segunda Feira (18/08) sita katak, ofisial senior sira husi Timor-Leste no Indonezia sei envolve iha diskusaun estruturadu ho objetivu, atu delimita Fronteira Maritima permanente ida entre nasaun rua.
Negosiasaun maritima formal akontese hafoin tinan lubuk ida husi dialogu informal, enkontru esploratoriu no troka informasaun teknika sira.
Governu Timor Leste tuir komunikadu nee kontinua komprometidu ba rezolusaun pasifika ba nia Fronteira Maritima sira tuir Lei Internasional no Konvensaun Nasoins Unidas kona-ba Direitu Tasi nian (UNCLOS).
Ronda negosiasaun Fronteira Maritima neebe sei mai sublina dedikasaun kompartida husi Timor Leste no Indonezia, atu mantein estabilidade rejional, kaer metin Lei Internasional no haburas relasaun vizinu neebe diak.
Timor-Leste fahe Fronteira Maritima ho Australia no Indonezia. Iha Marsu 2018 Timor Leste no Australia asina akordu ida iha Nasoins Unidas iha Nova Iorke neebe halo delimitasaun ba sira nia Fronteira Maritima.
Entretantu akordu nee hetan liu-husi prosesu Konsiliasaun Obrigatoriu UNCLOS nian. Negosia Fronteira Maritima ho susesu ho Indonezia sei permite Timor-Leste atu kompleta nia soberania maritima no direitu soberania, neebe importante tebes ba governasaun efetiva, konservasaun tasi, jestaun rekursu no seguransa nasional Timor Leste nian.
(alb)
