DILI, STLTIMORLESTE.com – Prezidente Republika (PR), Jose Ramos Horta halo enkontru ho Embaixador Kanada, Jess Dutton, hodi diskute oinsa hametin kooperasaun bilateral rai rua iha futuru.
Bainhira remata hasoru malu, Embaixador Kanada Nao Rezidente Jess Dutton ba jornalista sira iha Palasiu Prezidensial Nicolau Lobato, Bairo Pite, Dili, Kuarta nee (19/03/2025) hatete, onra boot hodi hasoru malu ho Prezidente Republika, hodi koalia kona-ba relasaun bilateral entre Timor Leste ho Kanada.
“Hanesan onra ida ba hau nia moris tomak no kolega sira iha Embaixada atu halo audensia ho prezidente, iha hasoru malu nee ami diskute area lubuk ida ba potensial. Kanada mos iha kooperasaun ho Timor Leste liu-liu suporta feto no labarik feto sira, ami halo diskusaun pozitivu,” katak nia.
Nia dehan, Kanada mos iha kompromisu boot atu haklean relasaun amizade no kolaborasaun hetan benefísiu barak husi matenek nain sira kona-ba asuntu global sira, nunee sai hanesan onra no previleiju boot ida ba nia halo audensia ho Prezidente.
Nia dehan, Kanada iha programa lubuk ida apoiu ba Timor Leste no apoiu mos ba feto no labarik feto sira liu husi kapasitasaun iha formasaun programa ai-haan nia.
Embaixador nee dehan, Organizasaun Kanada apoiu finansia ba konselhu ba governu kona-ba programa nutrisaun nian hodi fornese nutrisaun ba feto sira no labarik kiik sira.
“Kanada mos iha komitmentu boot atu apoiu Timor Leste hodi adere ba organizasaun Asosiasaun Sudeste Aziatiku ASEAN,” katak Embaixador nee.
Nia hatete, Kanada mak nasaun ida neebe boot liu daruak iha mundu, iha ema 40 milhões maibe iha aspirasaun hanesan no objetivu hanesan globalmente hanesan Timor Leste, sistema multilateral ida neebe forte ho orden internasional neebe bazeia ba regra sira ka iha interese diak liu ba ita nia nasaun rua no ita sei kontinua kolabora iha nível internasional hodi reforsa kestaun hirak nee,” katak nia.
Nia dehan, iha hasoru malu nee diskute inisiativa sira iha futuru atu haree saida mak posivel, hanoin katak bainhira Timor Leste adere ona ba ASEAN sei loke oportunidade barak liu tan ba kolaborasaun.
(eme)
