DILI, STLTIMORLESTE.com – Timor Leste (TL) ho Korea do Sul iha kooperasaun neebe diak tebes, dezde uluk too mai agora, no daudaun nee trabalhador Timoroan rihun 7 iha Korea do Sul hodi apoiu ekonomia mai TL.
Ministru Negosiu Estranjeiru no Kooperasaun (MNEK), Bendito Freitas ba jornalista iha Palasiu Prezidensial Nicolau Lobato, Bairo Pite, Segunda (02/03/2026) hatete, Timor Leste ho Korea do Sul iha kooperasaun neebe diak tebes iha area oin-oin, no too oras nee trabalhador Timoroan rihun 7 mak halao servisu iha Korea do Sul hodi hetan osan sustenta familia hodi ajuda ekonomia Timor Leste. “Korea do Sul ho Timor Leste iha kooperasaun neebe diak tebes iha area oin-oin iha area ekonomia, dezenvolvimentu iha imfraestrutura prinsipalmente mobilidade laboral hanesan ita boot sira hatene katak neste momentu ita iha trabalhador rihun 7 iha Korea do Sul, sira nia remesas mai Timor nee apoiu ekonomia ba familia mudansa makaas,” dehan Ministru.
Ministru Negosiu Estranjeiru dehan Prezidente mos fo emfaze, katak koperasaun ho korea do sul nee iha koperasaun diak tebes entre lider sira desde uluk too mai agora.
Prezensa ho embaixador foun nee kontinua deit mandatu serbisu reprezentasaun diplomatika ba sira nia pais atu bele marka katak koperasaun nee besik ba malu no Timor nia reprezentasaun mos iha neeba.
“Ohin prezidente mensiona ona duni papel trabalhador timor oan sira iha korea sul. No ita iha trabalhador barak neebe ke sira nia remesas ka sira fo mai Timor nee barak tebes importante sira iha neeba aprende lingua sira emprendedorismo neebe iha neeba, ohin la koalia maibe imforma katak sira serbisu iha industria, agrikultura fabrika,” dehan ministru.
Ministru hatete, nia mak loke dalan liu husi akordu entre Timor Leste ho Governu Korea do Sul hahu iha 2010 hodi haruka trabalhador Timor oan halao serbisu iha neeba too mai ohin loron.
“Hau mak loke dalan uluk nuudar akordo premeiru ho Governu korea do sul no trabalhador sira ba iha 2010 neebe too agora barak los ona iha neeba hanoin katak sira serbisu diak sira aprende iha nee laos laboral deit maibe konaba etika, responsablidade sai hanesan ema neebe joven diak responsavel, ida nee valor diak ida ita nia relasaun pais rua nee prosesu apredisajen ida haforsa liu tan ita nia joven sira fila mai sai sidadaun diak, no emprezariu neebe diak sira nia kontributu ba dezenvolvimentu nasional,” katak nia.
Oinsa MNEK nia haree liga ho funu iha Israel, Iran, oinsa ho Timor oan sira iha neeba haree ka kestaun nee Ministru hatete agora haree nuclear semo ba mai los no pais hotu hotu preokupasaun pais hotu iha mundu nee preokupa sira nia protesaun ba sira nia sidadaun sira.
“Ita prefere ita nia iha abu Dhabi ami kontaktu nafatin ho sira iha neeba mos atinzidu liu liu Aeroportu hotel ida tan, hau hanoin sira iha situasaun diak hela ita akompanha nafatin nomos iha pais seluk mos iha preokupasaun,” katak nia.
Nia hatutan liga ho Funu Prezidente Republika dentru 24 oras sei fo stegman konaba posizaun Timor nia ba situasaun nee.
Nunee mos Prezidente Republika Jose Ramos Horta hatete, ho Embaixador Korea do Sul CHANG no espresa konfiansa iha ninia abilidade atu haklean liutan lasu entre nasaun rua nee. No Timor Leste valoriza tebes ninia amizade ho Republika Koreia, parseria ida neebe konsistentemente kontribui ona ba dezenvolvimentu nasional.
Prezidente Ramos Horta sublina importansia husi amizade neebe naruk no nota katak Embaixador nia kontbinasaun unika husi nia esperiensia seguransa no diplomatika hanesan rikusoin ida neebe iha valor ba kolaborasaun iha futuru.
(eme)
